Chennaiyin chak zanah Mizo an langsar
Pathianni tlai Indian Super League inkhelah Mizo hming a mawi–Chennaiyin FC defender Jerry Lalrinzuala chuan Hero of the Match chawimawina a dawng a, Pune City midfielder Isaac Vanmalsawma hnenah Fittest Player of the Match chawimawina pek a ni thung.
Chennaiyin FC hian an mikhualna ramah Pune City chu 1-0 in an hneh a, he inkhela goal awmchhun hi Porto defender hlui Henrique Sereno khung a ni.
Pathianni zan ISL inkhel dangah Kerala Blasters chuan an mikhual Mumbai City chu goal khat ve ve khungin an inhnehtawkpui bawk a, Kerala Blasters tan Dutch striker kum 21 mi lek Mark Sifneos chuan goal hmahruai khungin Mumbai City tan Balwant Singh chuan an si phurh hi minute 77-naah a sut a ni.
Mizo an langsar
Shree Shiv Chhatrapati Sports Complex Stadium, Pune-a inkhelah Mizo player awm an inlan kim a, Pune tan Lalchhuanmawia Fanai leh Isaac ten inkhel bul an ṭan laiin Chennai club tan Jerry bakah Jeje Lalpekhlua chuan inkhel bul a ṭan bawk.
Pune match li khelh tawhah Chhuantea a la inlan vek a, Isaac-a'n match khatah a hmel a lan lo tih chu a inlan vek bawk. Chennaiyin-ah Jeje leh Jerry-a'n tlak tlum loh lai an la nei lo.
Manchester United assistant manager hlui Rene Meulensteen enkawlna hnuaiah Kerala Blasters tan Lalruatthara'n hmun pawimawh a chan chhunzawm zel a, Aizawl FC defender hlui hian Blasters match thumah inkhel bul la ṭan vekin Emerging Player of the Match-ah vawi khat thlan a ni tawh.
A hming chu Jerry
Jerry-a'n season hmasaah ISL-ah a hun hmasa ber a hmang a, Emerging Player of the League-ah thlan nghal a ni. Farkawn a piang, Bethlehem Veng rawlthar hian I League lamah pawh Emerging Player of the League lawmman a dawng a, ISL bikah hian match engemawzat Emerging Player of the match-ah thlan a ni bawk.
Mizo rawlthar hian tun season-ah pawh draft-a tel loin Chennai club tana khelh chhunzawm a thlang a, a thlang sual lo. Aston Villa boss hlui John Gregory hnuaiah hmun pawimawh a chang nghal a, match thum an khelh tawhah a la inlan kim vek!
Hei mai hi a ni lo, an match hmasa berah FC Goa 3-2 a an ngam loh ṭum pawhin Jerry hi Emerging Player of the Match-ah thlan a la ni cheu a, NorthEast United laka 3-0 a an chak ṭumin he chawimawina hi a dawng nawn a, Pune City lakah chuah Hero of the Match chawimawina meuh a dawng ta.
Lawmman
Chennaiyin FC 1–0 FC Pune City
Swift Moment of the Match Rafael Lopez, Pune City
Winning Pass of the Match Jaime Gavilan, Chennaiyin
Fittest Player Isaac Vanmalsawma, Pune City
Emerging Player Dhanpal Ganesh, Chennaiyin
Hero of the Match Jerry Lalrinzuala, Chennaiyin
Kerala Blasters FC 1–1 Mumbai City FC
Swift Moment of the Match Paul Rachubka, Kerala Blasters
Winning Pass of the Match Rino Anto, Kerala Blasters
Fittest Player CK Vineeth, Kerala Blasters
Emerging Player Davinder Singh, Mumbai City
Hero of the Match Balwant Singh, Mumbai City