Chak mamawh Juventus
Juventus tan Champions League last 16 lut turin hna thawh tur a la awm. Italian champion hian zanin dar 1:15-ah Olympiakos an lenchilh dawn a, an chak chuan an tlang chiang ang; an chak lo a nih erawh chuan inkhel dangah Sporting CP-in Barcelona an hneh hlauh a nih chuan Juve hi tla thei an la ni.
Group match an khelh hnuhnung berah khan Juve hi Barcelona nen goal awm loin an inhnehtawk a, Catalan club an tlang laiin Old Lady erawhin point riat chiah an la hmuh avangin an hnuaia awm Sporting CP tan umphak theih an la ni, Sporting hian Olympiakos 3-1 a hnehin point sarih an nei mek.
Bianconeri (Juventus sawina) hian inrintawkna sang tak nen Greek champion hi an hmachhawn theih a rinawm. Italian club ṭha hian kartawp inkhelah Serie A lama an chunga awm Napoli chu striker damkawr Gonzalo Higuain goal khat hmangin an hneh a, tlarhmaah Argentine hmatawng pahnih Higuain leh Paulo Dybala te an inkawp leh ngeiin a rinawm.
A chiang lo
Olympiakos hian September thla khan Besnik Hasi banin tun hma lama an manager ni tawh ṭhin Takis Lemonis an ruai a, Turin-ah si hnih faiin an chak lo nghal. Amaherawhchu, Lemonis kaihhruaina hnuaiah hartharna an chang mek a, an match hnuhnung pariatah vawi hnih chiah chak loh an nei; Greece Superleague-ah hmahruaitu an ni leh thei tawh.
Club pahnihte Allianz Stadium-a an intawn ṭum hian Juventus hian goal an nei thei mai bik lo, bench aṭanga lut Higuain bakah Mario Mandzukic ten hun tawp dawn lamah goal an khung hram a ni, Napoli striker hlui Higuain hi Olympiakos tan ven ngun ngai bik a ni ang.
Greece-a an intawn hnuhnung ber chu kum 2014-15 season kha niin, hemi ṭum hi chuan mualneitu an chak. Olympiakos tana Pajtim Kasami goal khung chu Juve lamin thungrulh ngei tum mah se Greek club goal-ah an khung thei lo a, chak tura rinkai zawk an hawihai–zaninah pawh thleng nawn leh thei a ni.
Iniesta tel lo in
Champions League Group D aṭangin Barcelona an tling chiang tawh a, zania an mikhual tur Sporting CP an hmachhawn hunah captain Andres Iniesta chu chawn na vangin a inlan thei dawn lo.
La Liga hmahruaitu Barcelona hian kartawp khan Celta Vigo chu Nou Camp-ah 2-2 in an inhnehtawkpui a, minute 53-naah Iniesta hi hliam vangin Denis Suarez chuan a rawn thlak a ni. Barca hi dinhmun chiang tawh an ni a, an mikhual tur Sporting hi last 16 beiseina la nei an nih avangin Spanish club tan zuam sual theih tur an ni–an intawn hmasak ṭum chuan Barcelona hian si khat faiin hnehna an chang.