Valencia an tlawm ve ta

Tun season La Liga-ah a vawi khat nan Valencia an tlawm ve ta–table-a pahnihna dinhmun luah mektu team hian an mikhualna ramah rin loh takin Getafe chu 1-0 in an ngam lo a, a chung bera awm Barcelona-in point ngain hma an hruai fal tawh.

Barcelona hian Inrinni zan khan an mikhual Celta Vigo chu goal hnih ve ve khungin an inhnehtawkpui a, chak zawk an awm lo–Valencia tan an chung chiaha awm Catalan club nena an inkar tih zimna remchang a ni a, mah se Marcelino nauten an hun ṭha neih an chhawr tlat lo.

10 > 11

Getafe khelmuala inkhelah mualneitu team-in minute 65 chhung zet chu player 10 nichungin an khel a, player 11 neitu Valencia aia goal an khung tam zawk miau avangin ball chang tlem zawk mah se point thum an hlawh chhuak–Getafe tan hian midfielder Mauro Arambarri chu minute 25 chhung leka yellow card pahnih a hmuh hman avangin hnawhchhuah a ni a, kim lo chungin mualneitu team an khel.

Valencia-in player tam zawka khel an nih an chhawr thei lo a, Markel Bergara chuan minute 66-naah he inkhela goal awmchhun hi a khung–yard 25 vela hla aṭanga a ball pet chuan Gabriel Paulista a per hnuah a lut a ni. Valencia tan Dani Parejo chuan si phurh sutna remchang nei mah se goal post a pet per a, Simone Zaza chuan hun pek belhah hnai set sawt aṭangin a tauh out bawk.

Benitez a ropui

Valencia-in an manager ropui hming an sawi apiangin tlar hmasa lamah Rafa Benitez hming lam rik a ni ṭhin–Spanish manager hian 2001/02 leh 2003/04 khan Real Madrid leh Barcelona Lal ram nia an sawi ṭhin Spain-ah ro a rel a, Valencia chu league nomawi a chawipui–2001/02 season-ah phei hi chuan an league match hmasa 13-ah tlawm hmel an hmu miah lo.

Pathianni zana Valencia-in league match an khelh hma khan Benitez-a record hi nihrual theihna remchang an nei a, Getafe kha hneh emaw draw ni se chuan an league match hmasa 13-ah an tlawm dawn lo tihna a ni–mah se Getafe khelmualah Liverpool boss hlui sulhnu ropui an chhunzawm thei lo a, Valencia an tlawm.

Barcelona lawmna

Valencia-in hnehna an chang zo lo a, an league match hnuhnung pahniha chak hmel hmu zo lo Catalan club lawmah a tla–Barca leh Valencia hi an inhmachhawn ṭumin 1-1 in an inhnehtawk a, hmahruaitu nih inchuh club pahnih hian an inhmachhawn zawha league match an khelh leh hmasak berah an chak zo lo ve ve.

Barca-in an khingpui an inhnehtawkpui a, Valencia an tlawm thung–Valencia hian hnehna chang se chu Lionel Messi leh a ṭhiante an phak lohna tur chu point hnih chauh a nih tawh laiin point ngain an inthlau ta. Barcelona chuan Valencia chak loh thu an hriat rual hian twitter lamah, "Hnehna kan chang zo lo a ni mai thei a, kan hmahruaina erawh a tam sawt a ni," tiin an tarlang a, Valencia chak loh an lawm.