A chung berah Inter Milan awm

Ivan Perisic-a hattrick hmangin Inter Milan chuan Chievo 5-0 a sawpin Serie A hmahruaitu an ni. Luciano Spalletti naute hian match 15 aṭangin point 39 an hmu a, an hnuaiah Napoli leh Juventus an awm thung.

Pathianni zan inkhelah hneh loh nei loa season hmang lai Inter tan hian Perisic bakah Mauro Icardi leh Milan Skriniar ten goal an khung bawk. Nipui bazar laia Manchester United nena sawi zawm hlawh tak midfielder Perisic hian season kal laiah goal sarih a khung tling tawh.

Inrinni zan khan khatih hunlaia hmahruaitu Napoli chu champion lai Juventus lakah si khat faiin an tlawm a, Juve, Napoli leh Inter te hi point hat ṭheuhin an inthlau mek - tunkar tawp hian Turin club leh Inter Milan te an inhmachhawn dawn; Serie A nomawi inchuh boruak a sang chho mek zel.

Inter Milan manager Luciano Spalletti chuan, "A bul kan ṭan fuh a, a tawp thlengin buaina nei loin kan kaltluang thei. Chievo kha hmunawl kan siamsak miah lo a, duhthusama ṭhain kan khel a ni. Ka naute khelh danah ka lawm em em a, kartawpah tun aia ṭha zawk hian khelh leh kan tum ang," tiin a sawi.