Zaninah Arrows-in Minerva an mikhual dawn

Season ṭantir aṭangin I League a ngaihnawm nghal a, inkhel a hmuhnawm thei hle–zanin dar 8:00-ah hian Indian Arrows chuan Minerva Punjab an mikhual dawn a, team pahnih inkhel turah match hmuhnawm beisei ngam a ni.

Minerva Punjab hian season hmasa aṭang khan an insiamṭha tawh tih pholangin an theihna an pholang a, an match hmasa berah Mohun Bagan chu 1-1 a an inhnehtawkpui hnuin Zirtawpni zan khan second division champion Neroca FC chu 2-1 in an hneh.

Punjab club tan hian an striker chhuanvawr Chencho Gyeltshen leh Ivorian striker Lago Dagbo Bei te chuan goal khat ve ve an khung a, Arrows lakah pawh an ni pahnih bawk hi an hlauhawm ang.

Hetihrual hian AIFF-in Indian rawlthar beiseiawm rual huikhawma a din Indian Arrows hi dah hniam theih an ni bik lo–an match hmasa berah khan Chennai City chu 3-0 in an sawp nghal a, Mizo tlangval Edmund Lalrindika leh Lalengmawia te awmna team hian Minerva hneh turin theihna an nei.