NBA season ti tawp mai se - Shaquille O'Neal

Basketball legend Shaquille O'Neal chuan NBA season an chawlh lailawk lai chu khel chhunzawm loin ti tawp mai se a duh thu a sawi a, player leh mipui hriselna dinhmun atan a ṭhat zawk a rin thu a sawi bawk.

NBA 2019-20 season kal lai chu coronavirus vangin March thla aṭang khan an chawl; United States-ah chuan NBA hi infiamna lian tham zingah hri leng vanga an chawlh hmasak ber a ni hial.

Kum 48 mi O'Neal chuan, "Inah awm vek rawh u, hrisel takin awm ula, nakkumah in rawn kir leh dawn nia," tiin kumin chhungin infiamna lam tih rih loh a fuh a rin thu a sawi.

NBA champion vawi li ni tawh chuan sawi zawmin, "Player inkhelh chak, playoff bakah NBA Finals inkhelh chak an awm a nih pawhin ka dem lo, an dinhmun tur ang chu ka hriatthiampui khawp mai.

"Mahse, kan ram dinhmun thlir chuan inkhelh chiah ka ngai lo, tun season hi khel zoin champion pawh awm se, season danga champion nen chuan a hlut dan pawh a in ang kher lo ang," tiin a sawi.

US hi khawvel ram mala hri leng kai tamna ber a ni, nimin tlai khan mi maktaduai 1.4 chuangin hri an kai tawh; mi 80,000 chuang an thi tawh bawk - nitin hri kai thar leh thi an la pun belh mek zel.

O'Neal-a hian player a nih laiin Los Angeles Lakers chu 2000 leh 2002 khan NBA champion a nihpui a, 2006 khan Miami Heat chu hlawhtlinna a chanpui leh bawk; inkhelh a chawlhsan hnuah Basketball Hall of Fame-ah dah luh a ni.