Penalty hmangin final lut tur zawng Police aia vannei Aizawl FC

Aizawl FC-in Mizoram Premier League-a vawi thum champion hmasa ber nih tumin final an lut.

First leg-ah AFC leh Mizoram Police 2-2 a an inhnehtawk hnuin Thawhṭan zanah minute 90 dang khelh leh ni a, 1-1 in inkhel a tawp. Penalty shootout hmangin I League club hian 5-3 in hnehna an chang.

Football hmuhnawm thlir tuma Lammual pan ten an lungawina an hmu a, ṭan bik nei zingah Police ṭantute an ngui laiin Red Army hlimin an zai.

December 9, Zir­tawp zanah champion zawnna Lammualah neih a ni dawn. Season tir aṭanga buk rit pahnih - I League champion Aizawl FC leh MFA Super Cup leh I Day Football champion Chhinga Veng FC inkhel tur hi 'Final Duhthusam' tia sawi theih a ni.

Intluk tawk
November 23, Ninganiah MPL6 semifinal first leg khelh a ni a, F. Lalrinpuia hmangin Mizo­ram Police-in minute 7-na lekah hma an hruai nghal.

Aizawl FC-in David Lalrin-muana freekick pet thiamna leh Afghan defender Masih Saighani lenna hmang ṭangkaiin goal hnihin an chhang let, minute 22-naah Masih-a'n a tauh goal bakah minute 85-naa Afghan defender tauh Police keeper Lalṭanpuia dan per chu AFC defender Lalhriatrenga'n a pet goal.

Police-in an huaisenna an pholang a, Lalfakzuala'n injury time minute linaah siphurh a sut. Minute 90 chhungin chak zawk an awm lo - mipuiin second leg an nghakhlel.

Minute 90 dang en châkawmna belhchhah turin Aizawl FC-in Salt Lake Stadium-ah India ram club ṭha East Bengal 2-2 in an draw leh chiah bawk.

A hun a thleng
Thawhṭanni zan a ni nachungin inkhel pawimawh thlir tumin Lammual khat mawi tawk mipui an pung khawm a, Aizawl FC leh Police ṭantute thawm a ṭhat avangin ṭan hma hauh aṭangin inkhel boruak a nung nghal.

Mizoram Police coach Lalbiak­sanga Colney-in an tlarhnung siksawi hretin Zomuanpuia aiah 1st Bn MAP Academy chhuak Lal­ruatpuia chu bul a ṭantir a, player 10 dang chu first leg-a bul ṭantu vek an ni.

Portuguese coach Paulo Me­­neses-a'n inkhel bul ṭan zen zen lo MPL4 best midfielder K. Lalṭhathanga (Puitea) chu bul ṭantu zingah a dah lut.

Besei pha inkhel
Attacking football khel ṭhin team pahnihin an tih ṭhin danin bul an ṭan ve ve a, minute thumna lekah Keifang winger Lalbiakhlua cross chu Police forward Fakzuala'n a tauh fuh lo hlauh. Minute khat hnuah I League-a goal hnih khungtu William Lalnunfela'n keeper ṬP-a chiah a hmachhawn hnuah goal zawnah a pet thei bik lo.

Thiam rual inkhelah tihsual a pawi a, mual laiah Puitea'n Police captain V. Lalṭanpuia ball a chhuhsak hnuah William-a pe nghalin, Kolasib tlangval hian H. Lalmuankima pe leh nghalin Bawngkawn tlangval hian minute 14-naah chiang zetin a pet goal.

Minute thum hnuah Police forward Valpuia'n vei lam aṭangin freekick a pet a, AFC keeper Avilash Paul-a'n chhût sualin Armed Veng tlangval Lalbiakhlua'n tawih zetin si phurh sutna goal a khung.

Aizawl FC-in ball chang tam mah se goal hmaah an chungnun bik loh avangin chak zawk tur a hriat loh.

Tactical Battle
Police coach BS-a'n a sawi lawk angin AFC ṭhatna set piece dan dan an zir ṭha tih a lang a, Afghan adefender Masih-a'n a tawnhriat ṭha hmang ṭangkaia amah vengtute laka talchhuah a tum pawhin a tâl pût zo lo, Police pahnih zelin an veng tlat. Match hnuhnung pahniha set piece aṭanga goal li khungtu AFC-in second leg-ah set piece aṭangin goal an khung tawh lo.

Amaherawhchu, AFC midfield laia awm David, Puitea leh H. Lalbiakthanga ten ball pass an thiam a, Portuguese coach Paulo hnuaiah AFC team pumpuiin passing game rang tak an khelh thiam bawk avangin Police midfielder-ten an chelh lo.

I League club hian first half-ah 64% ball an chang a, hei vang hian Police coach BS-a'n forward Valpuia chu midfield-ah pawt letin second half-a AFC ball chan zat chu 60% ah a tlahniam.

Inkhel boruak a san avangin Police coach-in inhliam vanga Ruapuia aia Zomuanpuia a dah luh bakah hun tawp dawn hnaia Biaktea aia Lalsangbera a luhtir bak substitution a siam lo.

Aizawl FC-in tlarhma lamah inhliam a nghah a, AFC boss Paulo-a'n season liam taa MPL best midfielder Lalruatfela Zote chu khelhna hun a rawn siam a, substitute dang erawh tlarhnung pui thei tur player hlir an nih avangin player dang a luhtir tawh lo.

Khelmual chhung lamah
Minute 20 hma lama goal hnih bak hmuh belh tur a awm tawh lo a, goal chance hmuh tur erawh a tam. AFC winger Albert Zohming­mawia'n first half-ah goal ban a pet per a, second half-ah erawh ball chang tlem zawk Police-in goal chance an ngah zawk.

Police midfielder Sanga ball pet kawh tak goal zawnah a kal lo a, Valpuia pet chu AFC keeper Avilash-a'n a dang hman tlat bawk. Second leg-a langsar ber MK-a'n Police defender TC Vanlalhruaia tihsual nangching hman mah se keeper ṬP-a a pet khum thei lo.

Ṭhumvawr a ni ta
Police captain Ṭ-a coin toss-ah a chak lo a, AFC-in penalty pet hmasak an thlang.

Captain David Lalrinmuana'n mawhphurhna la nghalin pressure sangah Zemabawk North tlangvalin 'cool' takin keeper a bum. Police lamin MFA Super Cup semifinal-a Chanmari West an hneh tawh loh avangin player-ten hlauhthawnna an ngah tih a lang a, West Warrior an hneh loh hnua lakluh Zomuanpuia'n bul ṭanin crossbar chungah a pet.

AFC player pathum William, Lalrinzuala leh Masih ten harsatna an nei lo a, Police tana pettu Valpuia, Lalrinchhana leh Hlutea te pawhin an pet goal vek.

A tawpah MK-a chungah mawhphurhna a tla a, Police keeper ṬP-a'n a dive-na lam thlak chiah mah se MK-a hian keeper tluk lohna lamah zawi muangin a pet lut.

Aizawl FC-in final an lut ta.

Kan thlen chinah kan lawm - Police coach
Mizoram Police coach Lalbiaksanga Colney chuan inkhelh banah chhuanlam siam a tum lo a, an thlen china a lawm thu a sawi bakah Aizawl FC tan duhsakna a hlan nghal.

Armed Veng pa BS-a Colney chuan, "Kan bul ṭanna aṭanga thlir chuan semifinal hi sang tak a ni a; amaherawhchu kan tum chu champion a ni. Kan duh thleng thei lo mah ila ka nauten an theihna zawng zawng an chhuah a, semifinal kan khelh dan kha a lungawi thlak hlein ka hria a, kan thlen chinah kan lawm thiam a ṭul a ni. Police lama kan hotuten min ṭawiawm ṭha a, kan supporter-ten an theihna zawng zawngin min au phur bawk a, an duh ang kan tihlawhtling thei lo erawh pawi kan ti hle," tiin Vanglaini a hrilh.

BS-a hian season liam ta khan Bethle­hem Vengthlang FC chu league round-ah pakhatna a nih pui hnuah final a hruai thleng a, tun season-ah Police chu point khat chauh hmua table mawngphaha an awm lai aṭanga enkawl ṭanin league round-ah pathumna a nihpui thei a, final an thlen lohna pawh penalty pakhat vang chauh a ni.

Aizawl FC coach Paulo Meneses chuan, "I League nomawi humhim kan duh ang thoin MPL champion hi kan duh a, Police kan hneh thei hi kan lawm hle. Final atan theihtawp chhuahin kan inbuatsaih ang," tiin a sawi ve bawk.