MPL6-ah 'Dream Final' kan hmu dawn

Season ṭan hma khan Mizo­ram Premier League Season 6-a final tura duh thlang dawn ila, mipui tam zawkin Chhinga Veng FC leh Aizawl FC hi an thlang ngei ang - December 8 zanah an inkhel dawn.

Chhinga Veng FC hi MPL-a team thar angin lang mah se player-te hi an thar lo a, Mizo player ṭha lak khawm an ni ber - coach pawh MPL5-a Chanmari FC champion puitu coach kha a ni.

Aizawl FC hi I League cham­pion an nih vanga en chakawm an ni mai lo a, Mizo zinga talent nei ṭha rual luh khawmna an ni - coach leh assistant coach atana European ruai thei club an ni.

Chhinga Veng an ropui

Champion a harsa a,a zawna champion phei chu thil harsa tak a ni. Chhinga Veng hi MFA Super Cup champion an ni a, an hmaa ding apiang an sawp a ni deuh ber.

He club hi Independence Day Football-ah pawh an champion zui thei a, team ṭha an ni. Season khatah champion nomawi pahnih an kawl tawh - lungthu kim law law an tum.

MPL khelh ṭan a ni a, an chak zel. MPL-ah hneh loh nei loin an kal reng a, an chak tluanglai titawptu chu Aizawl FC hi an ni.

He team, Chhinga Veng FC hi MPL league round vawi 14 khelhah khan Aizawl FC aiin point riat zetin an sang zawk.

Aizawl FC an ṭha tawh

Portuguese coach Paolo Meneses-a'n Indian football a hre lo a, Mizoram tualchhung football phei chu a hre lo hle. Aizawl FC a enkawl tirh lamah harsatna tam tak a tawk - player a la hre chiang lo a, Mizoram football kalphung a la man lo a, result ṭha an nei thei lo.

Aizawl FC-in a tir lamah beisei phak lo mah se, an insawhnghet chho a, coach-in player a hre chiang chho a, an fitness lamah hma an sawn bawk nen, an khel ṭha tawlh tawlh.

Season tawp lamah phei chuan Chhinga Veng an hneh ta hial a, an ṭha tawh hle tihna a ni. Hei mai hi a ni lo a, I League lamah Salt Lake Stadium-ah sum tam tak senga inla khawm East Bengal an zuk draw thei hial a ni.

Player teh an harsa

Team pahnih hi position tinah khaikhin dawn ila, team ṭha zawk sawi a harsa - mahni ṭan lam apiang kan sawi ṭha dawn a nih hmel!

Goal nawr turin Chhinga Veng FC lamin Malsawm­fela, Khawpuimawia, Lalram­muanpuia, MS Dawngliana leh Laldingngheta te zinga mi duh an thlang thei a; nimahsela Aizwl FC hian tun season league round match 14-ah goal 13 chiah an chhuah miau avangin Masih Saighani hoa ding tur an tlar hnung hi a khawng ṭha tawk tih a chiang.

Aizawl FC midfield trio David Lalrinmuana, Lalbiakthanga leh Lalṭhathanga (Puitea) te hi ball pe kual rang em em mai an ni a, an winger H Lalmuankima hi tun hnaia player hlauhawm ber pawl a nih piah lamah Albert Zohmingmawia a dam leh tawh. Chhinga Veng hian ball thiam leh fing R Malsawmtluanga an neih bakah che rang leh chau thei lo Lalrinchhana an kawl bawk a, midfield-ah Mizo ball thiam rual an insu dawn.

Fans an intluk tawk?

Season tluana fans neih ngah lamah chuan Chhinga Veng hi MPL6-ah chuan a sang ber an nih hmel. Au dan thiam leh team auh phur thiam lamah chuan Aizawl FC fans aia dahsan tur an awm bik kher lo ang.

Chhinga Veng chu veng lian an ni a, mipui pawh an ṭhahnem. Ruahsur hnuaiah pawh zan lam inkhel en turin mi ṭhahnem tak an nei reng thei. Aizawl FC hian I League-a champion nih kha fans lamah an chhawr a, an au hla an thiam rual a, fans ruhkawl intelkhawm, team chet chhiatlai pawha phatsan ve ngai lo eng emaw zat an nei.

Chhinga Veng leh 'veng/khaw dang zawng' inelna ang deuh a nih theih dan a awm a, hei vang hian final-ah pawh Chhinga Veng hi fans ngah zawk tura dah ngawt theih a ni lo a; nimahsela Chhinga Veng mipui ṭang rualin 'veng tan' an tih vaih chuan Lammual mawi hmak tur mipui an nei.

Thawhthu hlui chu a hlui!

Tun season-a an khelh dan enin Chhinga Veng FC hi champion kim thei khawpa ṭha an ni. Hetihlai hian Aizawl FC hi Chhinga Veng FC hneh turin an ṭha tawk tih a takin kan hmu tawh - MPL6-ah ngei Chhinga Veng an hneh tawh tlat.

Hetihlai hian football-ah hian 'inkhelh tawhna' a pawimawh tak tak lo a, Zirtawpni zana an inkhel tur chiah hi a pawimawh dawn.

Team pahnihin minute 90 an nei dawn a, an inkhelh tawhnain he minute 90-ah hian thu a sawi dawn lo - thawnthu hlui mai a ni.

Team ṭha pahnih, player ṭha rual awm khawmna, fans nei ṭha bawk an inkhel tawh a, ṭhutna ṭha chang tur chuan kal hma ve deuh chu a ngai ngei ang!

MPL6-a intawn tawhna
September 15, Zirtawpni
Aizawl FC 2 - 2 Chhinga Veng FC
AFC : K.Lalthathanga 19'; Jonathan Lalrawngbawla 49'
CVFC : Malsawmfela 7'; Lalhriatrenga 37' (OG)
MoM : Zothanmawia, CVFC
October 26, Ningani
Chhinga Veng FC 0 - 2 Aizawl FC
AFC : H. Lalmuankima 16'; Jonathan Lalrawngbawla 23'
MoM : H. Lalmuankima, AFC