Bayern hi kan tuihal - Alaba

David Alaba chuan a khelh mekna Bayern Munich chu inkhelh châka an tuihal thu a sawi a, tun kara team training an neih chu nuam a tih thu a sawi chhuak bawk.

Coronavirus vangin March thla laihawl aṭang khan German football an chawl lailawk. April thla chawhnu lam khan club-te chuan mimal training an kalpui a, tun kar tawp hian a hmuna entu awm loin league an khel chhunzawm dawn.

German ramah hri leng vangin mi 7,500 vel an thi tawh a, harsatna nasa tak tawk mah se European league lian zinga match neih chhunzawm leh hmasa ber an ni ang.

Bayern defender Alaba chuan, "Team pumpui kan training leh thei ta chu a nuamin a hlimawm ngei mai, player tin mai kan phurin kan tha tho em em vek. Match hmasa ber khelh kan chak tawh a, chumi tur chuan phur takin kan inbuatsaih," tiin a sawi.

German champion Bayern hian an elpui Borussia Dortmund lakah point liin hma an hruai fal mek, a zawna season riat nan Bundesliga nomawi chawi an beisei mek.

Chancellor Angela Merkel kaihhruai sorkar thuneitu lamin inkhelh hi an phalsak a, an khel ngei dawn. Mahse, season an hmang zo ngei ngei dawn tihna a la ni chuang lo, Bundesliga CEO Christian Seifert chuan club tin chu fimkhur turin a chah.

Seifert chuan, "Harsatna tam tak thleng thei a la awm, player bakah mipui harsatna nasa tak kan siamsak a nih chuan inkhelh hi tih tawp leh mai theih dinhmunah a ding," tiin a lo sawi lawk tawh.

Tun kar tawp inkhel tur zingah Dortmund leh Schalke ten Signal Iduna Park-a derby an khelh tur chu ngaihven hlawh a ni a, team inel leh inhal tak pahnih hi kum 95 chhunga a vawi khat nan entu awm loin an khel dawn.

Dortmund coach Lucien Favre chuan, "Fans 82,000 hmaah kan inkhel ṭhin, tunah chuan entu awm loa inkhelh a ngai dawn, inbuatsaih dan pawh thiam a har hle," a ti. Signal Iduna Park hi German rama stadium lian ber a ni a, entu an tam thei hle.