FA Cup third round Merseyside Derby kan hmu dawn

England-a football inelna ngaihhlut hlawh FA Cup third round-a intum tur chu nimin khan tihchian a ni a, Liverpool chuan an hmelma kum­hlun Everton an hma­chhawn dawn.

FA Cup champion lai Arsenal chuan Nottingham Forest an lenchilh dawn a, Premier League hma­hruaitu Manchester City-in Burnley an mikhual ang.

Premier League champion Chelsea chuan khualmualah Norwich City an lenchilh dawn a, club langsar zingah Manchester United chuan Old Trafford-ah Derby an mikhual dawn thung.

English seventh division club Hereford chuan Fleetwood an hneh a nih chuan third round khel tur zinga division hniam ber an ni dawn tihna a ni a, Leicester City an hmachhawn ang.

Fifth division club Woking-in Peterborough an ngam a nih chuan John Terry captain-na hnuaia khel Championship club Aston Villa an lenchilh dawn thung.

Liverpool-in Anfield-a FA Cup-ah Everton an la hneh ngai miah lo a, tun season-ah an record duhawm lo thaibona remchang an nei dawn.