Ronaldo-a'n record a siam leh dawn?
Champions League group stage match ruka goal khung kim vek thei an la awm ngai lo. Cristiano Ronaldo-a'n zanin dar 1:15-a Borussia Dortmund an mikhual hunah a khung a nih chuan player dangin an la tih theih ngai loh hi a ti ang.
Nizan khan Paris Saint-Germain chuan Bayern Munich an lenchilh a, PSG hmatawng Neymar-a'n goal a khung a nih chuan Ronaldo aiin record a siam hmasa dawn tihna a ni thung. Ronaldo leh Neymar te hian an group match hmasa pangaah goal an khung vek.
Portugal captain Ronaldo hian tun season Champions League-ah goal riat khung tawhin top scorer a ni mek a, Bundesliga club Dortmund tan pawh ven ngun ngai bik tur a ni ang. Ronaldo hian goal khat aia tam a khung a nih phei chuan Champions League group stage bika goal khung hnem ber Lionel Messi (60goals) khumin record dang a siam thei dawn bawk.
Real Madrid hian an match hmasa pangaah point 10 hmuin pahnihna ni chungin last 16 an lut chiang tawh a, chutih rualin Spurs hi point-ah la nihrual thei mah se an intawn ṭuma an chak loh avangin pahnihnaah an lungawi a ṭul tawh dawn a ni. Dortmund hian Europa League khel zui tur pawhin hnehna an mamawh thung.
Dortmund midfielder Christian Pulisic chuan Real Madrid nena an intawnna tur Santiago Bernabeu chungchang sawiin, "Nikum khan kan intawng tawh a, inkhel bulṭantu zingah ka tel ve phak. Khelmual nuam leh ropui a ni a, fan an turu em em bawk. Tun
ṭumah pawh inkhel boruak sang leh hlimawm kan hmachawn leh ngei ka ring," tiin a sawi.
Harh ngai Spurs
Real Madrid leh Dortmund an hneh theih avangin Tottenham hi team ṭha leh puitling zinga chhiar an ni hman. Mahse, tun hnaiah Spurs hian Premier League-ah result ṭha an nei hleithei lo a, zanin an mikhual tur APOEL Nicosia lakah insiamṭhat an tum ang.
Tottenhman hian tun hnai an match hnuhnung paliah chak ni hmel an hmu thei lo, inelna hrang hrangah match ruk aṭangin vawi khat chiah hnehna an chang bawk - Mauricio Pochettino nauten harh an ngai takzet.
Spurs leh Apoel te an intawn hamsak ṭumin Harry Kane-a'n Champions League bika a vawi khat nan hattrick a siam a, England international striker hi Premier League lamah a goal khung kaltluang lai tawp rih mah se Cyprus club hmaah chuan an hmachhuan leh ber tur a ni.
Zanin Wembley Stadium-a inkhelah Dele Alli a inlan dawn lo, Spurs manager Poch chuan, "Alli nen buaina kan nei lo, a khelh
ṭhat loh vanga chawlhtir pawh ka ni hran lo, match a tam avangin player ṭhenkhat an hahchawlh a ngai," tiin a sawi.
Kum 21 mi Alli hi season hmasa khan Tottenham player pawimawh leh ṭangkai berte zinga mi a ni a, midfielder ni chungin inelna hrang hrangah goal 18 a khung thei. Mahse, a nungchang mawi lo vangin Champions League group match hmasa lam kha khel thei loa hrem a ni a, tun ṭuma an awltir chhan tur erawh hmahruaitu an nih chian tawh vang a ni thung.