Champions League A thiam 16 zingah Liverpool?
Zanin dar 1:15-ah Liverpool chuan Champions League match khel turin Spartak Moscow an mikhual dawn a, Anfield-ah hnehna an chang a nih chuan hmahruaitu nichungin last 16 an lut dawn.
Liverpool hian draw ringawt pawhin last 16 an lut thei dawn a, a sawi dan awlsam berah chuan Reds tan a thiam 16 zinga tel lo turin kawng a zim zawk a, fans beisei ber tur erawh hnehna chan a ni.
Dinhmun ṭha Reds
Liverpool-in an league match hnuhnung pahnihah goal riat ngawt khungin goal khat chiah an chhuah a, he team-in a theihna an neihsanzia chu sawi nawn ngai a ni lo - zaninah last 16-a team ṭha pumpelha hmahruaitu ni turin an kutah engkim a innghat a, Sevilla laka 3-0 a hma an hruai zet hnua sut zawh tir lehtu team hian an mualah fimkhur takin an khel ang.
Reds hi tun season Champions League-ah kher erawh in chhuang thei an awm lo - an vawi hnih chak hi tla chiang tawh Maribor laka an chak ve ve a ni a, Sevilla chu vawi hnih inhnehtawkpuiin Spartak an inhnehtawkpui bawk - Russian club hi zaninah an ngam loh a, Sevilla-in zanin dar 1:15-ah vek Maribor an hneh bawk si chuan an tla daih thei - an dinhmun a ṭha tih rualin him chianga in dah chi an ni tihna erawh a ni lo.
Tlarhma hlauhawm
Liverpool fan-te thla ti muangtu chu Mohamed Salah a ni. He Egyptian winger hian Reds tan tun season-ah inelna hrang hrangah match 21 khelin goal 21-ah a inrawlh tawh - goal 17 khungin assist vawi li a nei. Anfield-ah a tlangnel lehzual dawn a, Spartak tlarhnung tan in ven uluk a fin thlak ang.
Spartak tana chanchin lawmawm loh dang chu Liverpool hian Salah chauh lo pawh tlarhmaah chhuan tur an nei nual - Roberto Firmino-a'n goal 11 khungin assist pali a nei tawh a, Philippe Coutinho-a'n goal ruk khungin assist pasarih a nei tawh a, hliam vanga a inlan tam lo nachungin Sadio Mane chuan goal nga leh assist pali a nei bawk. Anni ho dan tum hi hna hautak a ni dawn.
Matip a inhliam
Liverpool defender Joel Matip-a'n hliam vangin Brighton & Hove Albion 5-1 a an sawp ṭumin a hmel a lan thei tawh lo a, Reds boss Jurgen Klopp-an defence laiah Emre Can leh Georginio Wijnaldum a din tir - zaninah pawh Matip a la inlan thei dawn chuang lo a, Klopp-a'n tlarhnung phuahchawp a hman leh a ṭul ngeiin a rinawm.
Klopp chuan, "Matip hi engtia rei nge a chawlh dawn a la sawi theih loh a, chiang taka ka sawi theih erawh zaninah a la inlan thei lo ang. Thla khat a chawlh pawh a ngai mai thei a, chu ai pawhin a rei lo mai thei," tiin a defender chungchang a sawi a, zaninah chuan a inkhel dawn lo tih a chiang.
Group E bihchianna
Liverpool : Spartak Moscow an hneh chuan hmahruaitu nichungin last 16 an lut ang a, draw result nen pawh knockout round an lut tho ang.
Sevilla : Maribor an hneh chuan last 16 an lut chiang ang a, Liverpool-in Spartak an hneh chuan draw result nen pawh an lut tho bawk ang. Reds-in Spartak an draw emaw an tlawm a, Sevilla hian hnehna an chang a nih chuan group hmahruaitu nichungin last 16 an lut ang.
Spartak Moscow : Anfield-ah hnehna an chang a nih hrim hrim chuan last 16 an lut ang a, chak result an hlawh chhuak zo lo a nih erawh chuan Europa League lamah an lungawi a ṭul dawn thung tihna a ni.
Maribor : Match hmasa panga aṭangin point hnih chiah an la hmu a, Sevilla hneh pawh ni se an tan awmzia a nei tawh lo.