Manchester derby khel lo tur Pogba

Manchester United chuan Paul Pogba-a red card hmuh an khinglet dawn lo a, kartawpa Manchester City nen Premier League an khelh hunah a inlan thei dawn lo tihna a ni.

France international Pogba hi kartawpa Arsenal nen Emirates Stadium-a an intawn ṭumin hnawh­chhuah a ni, Pogba hi Arsenal wing back Hector Bellerin a rah luih vanga hrem a ni.

Man United hian an duh a nih chuan Football Association hnenah an midfielder hremna hi an khing let thei a, mah se an khinglet dawn ta lo. Pogba hi nizan khan Champions League lamah chawr a ni a, league lamah erawh City bakah Bournemouth leh West Brom te a hmachhawn thei dawn lo a ni.