Man City kutah Napoli innghat

Manchester City-in Premier League lama an chet ṭhat ang thoin Champions League lamah an kal fawr a, Pep Guardiola hote hian match nga an khelh tawhah la chak vekin Group F hmahruaitu an ni chiang tawh. City hian zanin dar 1:15 hian an hnuai chiaha awm Shakhtar Donetsk an tlawh dawn a, pathumnaa awm Napoli-in khualmualah Feyenoord an hmachhawn ve bawk dawn.

Italian club Napoli hian Dutch club an hneh theih chuan Shakhtar nen point 9 an hmu thei chiah dawn a, head to head a an ṭhat zawk avangin knockout stage an lut ang. Amaherawhchu, Serie A club duhthusam tihlawhtling tur chuan City hian Ukrainian club an hneh sak a ṭul dawn a ni.

City hian kartawpah Manchester Derby an khel dawn a, West Ham an hneh ṭuma chakna goal khungtu David Silva chu Manchester United nena an inkhel tur thlir chungin squad-ah an dah lo a, Spanish midfielder goal khung tur siam saktu Kevin de Bruyne chu hrem vangin a inlan thei dawn lo. Pep Guardiola-a'n player ṭha dang zawng erawh Ukraine lamah a zin pui a, rawlthar duhawm Phil Foden, Brahim Diaz leh Tosin Adarabioyo leh keeper Danny Grimshaw te chu player 20 awmna squad-ah a tel bawk.

Pep Guardiola chuan, "Liverpool kan hneh a, Stamford Bridge-ah kan chak a, Italy-ah Napoli kan hneh a, Shakhtar kan hneh tawh bawk avangin inrintawkna kan ngah hle. Mahni inringtawk ve satliah kan ni lo a, keini chuan a takin kan tawng a, kan hmu a, kan hria a ni," tiin an rilru put hmang a dik thu a sawi.

Barcelona leh Bayern Munich manager hlui Pep chuan sawi chhunzawmin, "Khawi hmunah pawh khel ila, tu pawh hmachhawn ila, chak thei turin kan ṭha tawk tih ka hria. A tawp thlengin kan bei ang a, champion tumin inelna kan hmachhawn apiangah kan khel ang," tiin a sawi. City hian inelna hrang hrangah match 19 chhung an chak zawn tawh a, Shakhtar tan point hlawhchhuah a awlsam lo ang.

Napoli tan erawh City result hi an hmalam hun hriltu a ni dawn a, an tih theih chhun chu an muala 3-1 a an hneh tawh Feyenoord hneh nawn a ni. Italian club hian Zirtawp zanah Serie A champion lai Juventus 1-0 in an hneh lo a, hemi ṭum hian Lorenzo Insigne chu inhliam vanga lakchhuah a ni. Feyenoord khelmual De Kuip-ah Italian forward Insigne hi a inlan thei lo a nih chuan Napoli hmabak a harsa sawt ang.