A chung berah Wolves

English club-te inelna sang ber pahnihna Championship lamah Wolves chuan Birmingham City chu si khat faia luhchhuahin point 47 an hmu ta a, league hmahruaitu an ni.

Thawhṭanni zan inkhelah Wolves tan Leo Bonatini chuan he inkhela goal awmchhun hi a khung a, a zawnin league match ruk chhung hnehna an channa chiah a ni zui nghal bawk.

Wolves hian hun ṭha tak tak insiam zui thei mah se keeper David Stockdale an paltlang theih tak loh avangin goal khatah an lungawi a ṭul a, Birmingham player Harlee Dean chu hun tawp dawnah hnawhchhuah a ni.

Premier League lama an hmel kan hmuh tawh ṭhin Birmingham hian season an hmang chhe rih hle, league match 20 khelh tawhah point 16 chiah hmuin tlahniam thei dinhmunah an la ding, goal 10 chiah an la khung.

Wolves head coach Nuno Espirito Santo chuan, "Vawi khatah match khat chiah zel kan ngaihtuah a, tunah chuan Sunderland nena kan intawn tur chiah kan ngaihtuah tawh ang, a dang chi nidangah a ni leh mai," tiin ngaihtuah lawk vak ai chuan match khata rilru sawrbing a ṭul thu a sawi.

Birmingham City manager Steve Cotterill chuan Wolves chu tun season Championship club khel ṭha tluang ber an nih thu a sawi a, a naute chu inkhel chawhnu lamah khel ṭha viau mah se hun chanve hmalama an tihsual an tawrh thu a sawi bawk.