Crystal Palace-in Stadium zauh dawn

Premier League club Crystal Palace chuan an stadium Selhurst Park chu mipui 34,000 lenna tura tih len an tum thu an puang a, hemi atan hian pound maktaduai 75 - 100 inkar an seng ang.

Palace chuan an stadium sak thar tur hi kum thum chhunga an zawh hman an beisei thu an sawi a, tun aṭanga thla 12-ah a siam hna hi an thawk ṭan ang. Palace stadium zauh tur/din thar tur atana hmalatu KSS hi Anfield, Twickenham leh Wimbledon stadium zauh nana hnathawktu bawk kha an ni.

Kum 2013-a Premier League an inpetkai hnuah Palace hian an khelmual Selhurst Park din thar tum hian hma an lo la reng tawh a, hmun danga insawn tumna hial awm mah se club chairman Steve Parish chuan an neihsa chei ṭhat a, tih zauh mai chu an tana ṭha zawk a nih beiseiin an ti thlu ta niin a sawi.

Selhurst Park-ah hian tun dinhmunah mipui 25,456 an leng mek a, Palace chairman chuan an tum ang taka an stadium an din hunah chuan London Chhim Veng lam tan chuan chhuantham tak a nih tur thu a sawi a ni.