Djokovic-a'n training a ṭan ve leh ta

World number 1 hlui Novak Djokovic chuan season thar inbuatsaih nan training a nei ṭan ve leh ta. Djokovic hi Andre Agassi chuan Monte Carlo-ah a awmpui tawh a, a coach thar Radek Stepanek pawhin a zawm ve thei tawh.

Serbian thiampuipa hi nikum Wimbledon quarterfinal-a a chak loh hnuah a la inkhel leh thei lo a, season thar ṭan nan Qatar Open-ah inlan theih a beisei a ni.

Grand Slam vawi 12 champion tawh Djokovic hian kum 2016-a French Open nomawi a chawi hnuah a kiu na vangin a buai ṭan a, a tirah chawlh phah nghal lo mah se a dam chian mai theih loh avangin season hmasa chawhnu lam aṭang khan a inkhel ta lo.

Kum 30 mi Djokovic hi world ranking-ah Andy Murray-a'n a chung ber aṭanga a hnuh thlak hnuah hmasawn zawngin a kal thei tawh rih lo a, tun dinhmunah chuan number 12 a ni mek.

Beiseina a neih thu sawiin Djokovic chuan, "Andre Agassi leh Radek Stepanek te nen training kan nei a, hmasawna tur tam tak la nei mah ila tun dinhmunah chuan hun nuam tak a ni. Anni pahnih kaihhruaina hnuaiah hian season thar duhawm tak ka hman theih ngei ka beisei," tiin a sawi.

Season tharah Agassi hian Djokovic-a tournament khelhna zawng zawngah a kalpui thei dawn lo a, world number 1 hlui Stepanek erawhin season tluanin a kaihruai thei ang.

Tennis season liam ta khan Djokovic bakah Murray leh Stan Wawrinka te chu hliam vangin an khel tam lo a, legend pahnih Rafael Nadal leh Roger Federer ten an ropui zia an lantir ve leh thung. Nadal leh Federer te hian nomawi 13 an chawi a, Grand Slam pali chu pahnih ve vein an insem bawk.