Indian Super League : Delhi-ah Jamshedpur an zin

Indian Super League-ah Delhi Dynamos-in chak result nen bul ṭan mah se an match hnuhnung pahnihah chak hmel an hmu tawh lo - zanin dar 8:00 hian Jamshedpur FC an mikhual dawn a, ISL club thar lakah insiamṭhat an tum ang.

Jamshedpur club-in an match hmasa pathumah tlawm hmel la hmu miah lo mah se season tawpah a sang pali zinga tel an duh a nih chuan harhchhuah a hun tawh - match thumah hian an khingpui an inhnehtawkpui vek a, goal an khung lo vek bawk!

Goal la chhuah lo team JFC tana manganna chu goal la khung lo team an ni tel lai hi a ni a, Manchester City boss hlui Steve Coppell-a'n a naute lak aṭangin chak leh 'goal' a beisei tawh ang.

Delhi Dynamos-ah Lalhmangaihsanga Ralte leh Lallianzuala Chhangte te chu player pawimawh an ni a, Lunglei rawlthar Zuala phei hi chuan match thum a khelh aṭangin Hero of the Match leh Emerging Player of the match chawimawina a dawng tawh.

Jamshedpur lamah Jerry Mawihmingthanga pawimawhna a nep bik lo. Chanmari rawlthar hian season hmasa ISL-ah Northeast United tan hmun pawimawh chang phak lo mah se JFC-ah erawh match thum an khelh tawhah inkhel bul a la ṭan vek a, player pawimawh a nihzia pholan nan ATK nen goal awm loa an inhnehtawk ṭumin Emerging Player of the Match a ni - Delhi khawpuiah Mizo rawltharin chungnung zawk nih an inchuh dawn e.