PBL hi sum vanga khel tur ka ni lo - Gilmour

Khawvel huap Badminton inelna zinga sum fai tamna ber Premier Badminton League (PBL) khelh hun a hnai a, he huna inlan tur Scotland number 1 Kirsty Gilmour chuan sum tam vang chauha PBL khel tur a nih loh thu a sawi chhuak.

Badminton player

ṭhenkhat hian kum khat chhungin chhiah leh fund atan £30,000 (Rs 25,98,780) vel an chawi ṭhin a, player naran tan a tam tham ve hle. PBL hi December 22 aṭanga khelh ṭan tur niin ni 24 chhung chauh a awh dawn, Bengaluru Blaster tana khel tur Gilmour hian tun season PBL-ah hian £38,000 (Rs 32,93,004) a hlawh hman dawn a ni.

Kum 24 mi Gilmour chuan, "Player tin kha lei theihna zat a awm vek a, £38,000 zeta min lei kha chu ka tan chuan chanchin lawmawm leh hlu tak a tling, imfiamna a ni a, sum vanga kal anga insawi chu a fuh lo a, khawvel player ṭha an fuankhawm dawn a ni," a ti.

India ram chhungah cricket inelna Indian Premier League hlawhtling taka kalpui a ni a, cricket tih dan zul zuiin badminton inelna buatsaih leh a ni, khawvel player ṭha 133 vel zet chu lilam an ni a, team pariat inelnaah hian tunlaia khawvel huap player ṭha chu an inlan kim thawkhat hle ang.

Gilmour bakah hian Denmark tlangval Viktor Axelsen a inlan dawn, mipa singles world number 1 hi Bengaluru Blasters tan a khel thung dawn a ni.