Penalty thleng nawn tawh lo se ka duh - AFC coach
Aizawl FC-in penalty hmanga Mizoram Police hnehin Mizoram Premier League Season 6 final an lut a, Portuguese coach Paulo Meneses chuan Chhinga Veng nen an inhmachhawn hunah penalty ngai loa hnehna chan an tum thu Vanglaini a hrilh.
'Dream Final' tiha hming lem an pek MPL6 final hi December 8, Zirtawpni zan hian Lammualah khelh a ni dawn. Minute 90 chhunga chak zawk an awm lo a nih chuan extra time khelh a ni dawn a, an la inhnehtawk fo chuan penalty hmanga chak zawk zawn tur a ni.
Police nena an penalty pet ṭum sawiin Paulo chuan, "Ka naute ka ringtawk hle. 'Hlauthawng suh u, penalty hmangin final kan thleng ang,' tiin ka fuih a. Penalty pet tur kha ka thlan ni loin a pet ngamin an pet," tiin a sawi.
AFC tana penalty pet tura pen chhuak David Lalrinmuana, William Lalnunfela, Lalrinzuala, Masih Saighani leh H. Lalmuankima ten an pet goal vek.
Portuguese coach hian semifinal-a an chak ṭumin a inrintawk thu sawi mah se final-ah erawh penalty thleng nawn lo se a duh. AFC boss chuan, "Team ṭha tak kan tum dawn a, kan inkhel tawk dawn. Penalty thlen nawn kan tum tawh lo a, minute 90 chhunga chak turin theihtawp kan chhuah ang," a ti.
Aizawl FC hian kumin MFA Super Cup-ah Chanmari FC chu penalty shootout hmangin an hneh tawh bawk a, penalty pet pawh ṭul se an record ṭha tak avang hian an inrintawk ang.