Mahuma Memorial Tournament I Div Gorkha ngam rual loh 3C

Mahuma Memorial Cricket Tournament nimin inkhelah Chhinga Veng CC-in an thiam thil an 'show' a, run siam an thiam tih pholangin Gorkha CC chu run 209 zetin an sawp.

Suaka Cricket Ground-a inkhelah Chhinga Veng an bat hmasa zawk a, Samit Das a langsar hle - ani hian century meuh siamin ball 99-a hmachhawnah run 109 a vaw chhuak a, Lalthlamuana (42 runs) leh Lalhruaimawia Ralte (58) te hming lam hmaih a thiang lo. 3C hian over 40-ah run 270 vaw chhuakin wicket sarih chiah an hloh.

Gorkha CC-in chak turin ball 240-ah run 271 zet an siam a ngai a, hna awlsam a ni lo. Tun inelnaa run 200 vawi hnih vaw chhuak thei Gorkha-in beisei an phak lo -an top four batsman zinga pathum run siam loin an out a, run siam hnem ber Sameer Thapa pawhin run 23 bak a tlin miau loh avangin an tlawm - tun tournament-a insawp chiang ber an ni.

Bowling lamah Chhinga Veng tan left arm pacer Raj Kumar Thakur chu che ṭha ber a ni a, over li a vawmah run 12 chiah pein wicket li a la.

Nimin Inkhel Result
Chhinga Veng CC: 270/7 (40) bt Gorkha CC: 61/10 (17)
*Run 209-in Chhinga Veng an chak
Vawiin Inkhel Tur
09:30 AM Zemabawk Pitchers vs Chanmarians CC