AIFF Executive Committee Santosh Trophy final round titawp lailawk

All India Football Federation-in nimin khan video conference hmangin Executive Committee meeting an nei a, Covid-19 hri avanga inkhelh theih lohte chu tunah chuan tihtawp vek a ni dawn.

Mizoram thlen tur Santosh Trophy final round pawh a tel a, India-in a thlen tur 2020 FIFA Under 17 Girls World Cup chu kum 2021-a neih turin FIFA-in a sawn bawk.

Ṭum dangah chuan Football House, Dwarka, New Delhi-ah meeting neih ṭhin a ni a, tun ṭumah erawh a vawi khat nan Video Conference hmanga neih a ni.

AIFF president Praful Patel-a'n meeting hi a kaihruai a, Mizoram Football Association honorary secretary Lalnghinglova Hmar pawh meeting pawimawhah hian a tel.

AIFF Competition Department-in an calendar siam tawh sa kalpui theih a nih loh thu an thlen chu Executive Committee-in a ngaihtuah a, Covid-19 hri avanga inkhelh theih lohte chu tunah chuan tihtawp vek turin thutlukna an siam.

Inelna kalpui zel dan tur chu tha thara ngaihtuah leh tura dah a ni - heti a nih chuan Mizoram thlen tur Santosh Trophy pawh tihtawp lailawk a ni dawn tihna a ni.

Mizoramin a vawi khat nan Santosh Trophy final round thlen tumin nasa takin a inpuahchah a, inelna thleng turin inpeih tawh mah se coronavirus vangin an thlen theih a rinawm ta lo.

Mizoram team pawh kum 2014 hnuah a vawi khat nan champion leh ngei tumin an inpuahchah a, amaherawhchu T. Vanlalhluna leh Lalremtluanga hoten Covid-19 vangin training an tihtawpna pawh thla khat a ral ta. Football ngainatuten Mizoramin football inelna lian thleng ve se tia an beiseina chu thleng dik tur chuan ngah leh hret a ṭul ang.

Season tharah I League-ah foreigner tlem zawka khelh chu AIFF Executive Committee chuan a pawm. AIFF Technical Committee chuan tun hnai khan foreigner pali (3+1) chiah khelh phal ni se tiin rawtna a siam tawh a, heng pali zinga pakhat hi Asian a ni ngei tur a ni. 

I League club lam pawhin hei hi ṭha an titlang a, AIFF Executive Committee kutah dah a nih hnuah foreigner tihtlem hi pawm a ni ta  - season tharah hman ṭan a ni ang.

ISL-ah pawh foreigner tih tlem hi a thuphung chuan ṭha an ti a, a taka hmang tur chuan hun a duh hret dawn. Nimin tlaia meeting-a tel ve ISL-a an hotupa Football Sports Development Limited (FSDL) lama an CEO Martin Bain chuan, "He rawtna hi ISL lamah pawh kalpui a ṭha ang a; nimahsela vawi leh khata kalpui theih a ni lo ang. Rawtna ṭha tak a ni a, ISL-a kalpui tur chuan hun a la duh deuh ang," a ti a, season thara ISL-a foreigner khelh phal zat chu pasarih a la nih zel a rinawm.

2021 season ṭanna atan AIFF Futsal Championship neih tum a ni a, Covid-19 vanga harsatna a awm a nih loh chuan AIFF Executive Committee-in a lo pawmpui tawh angin season tharah hian AIFF Futsal inelna hmasa ber ṭan tum a ni.

I League CEO Sunando Dhar chuan I League leh ISL club ṭhenkhat chuan season thara futsal competition-a tel an duh thu hi an hriattir tawh niin a sawi.

AIFF-in player registration leh transfer chungchangah FIFA transfer window (June 9- August 31 leh January thla pum) a zawm ṭhin a, FIFA aṭanga phalna an hmuh angin season thara player registration leh transfer window chu thlak danglam a ni dawn. Covid-19 boruak thlir chungin transfer window hi siam thar tur a ni.

India national team kal zel dan tur pawh ngaihtuah a ni a, hri leng avanga national camp engmah neih theih a nih loh avangin calendar awm sate pawh 

ṭhulh lailawk vek a ni.

2020 FIFA Under 17 Girls World Cup India-in a thlen tur kum thara sawn a nih thu sawi a ni. FIFA chuan a thlengtu tur khawpui panga - Bhubaneswar, Kolkata, Guwahati, Ahmedabad leh Navi Mumbai-ah inkhelh zat tur ngai anga kalpui a rem tih thu an sawi lang.

AIFF E License chu coach kailawn hmasa berah hman a ni tawh dawn a, D License nei turin E License neih hmasak a ngai dawn a, Covid-19 hri leng a ziaawm hunah kalpui ṭan a ni ang.

Meeting-ah hian Indian footballer ropui tun hnaia thi PK Banerjee leh Chunni Goswami-te sunna hun hman a ni.