MPL9 champion Chawnpui FC

Chawnpui FC-in bung thar an kai ta - Mizoram football-a inelna sang ber Mizoram Premier League-ah coach Lalsangzuala Hmar kaihhruaina hnuaiah an champion. Kum 1995-a din Chawnpui hian kum 2018 aṭang khan MPL an khel ṭan a, season thum an hmachhawnnaah nomawi hi an chawi a ni.

December 6, Thawhlehni zan khan RG Stadium-ah Chawnpui FC leh FC Venghnuai ten final an khel a, hun pangngaiah 2-2 in an inhnehtawk. Penalty shootout-ah bench aṭanga rawn lut goalkeeper Lallawmzuala chu Chawnpui 'hero' a ni a, penalty shootout-ah 5-3 in hnehna an chang.

MC-a Show
Final-ah entu an ṭhahnem a, RG Stadium-a 'bucket seat' awm hnua entu tam ber ṭum a ni. Football hmuhnawm hmuh duha pung khawm mipuite hi Chawnpui leh Venghnuai ten an duh ang tak an lo chhawpsak.

Venghnuaiin passing game mawi an rawn khel a, Chawnpui lamin hmun awl zawngin ball an vawrh nasa. Final boruak sangah coach tawnhriat ngah zawk Sanga hote an insiamrem rang zawk a, goal pawh an khung hma zawk.

Tun inelna striker khel ṭha bik MC Malsawmzuala chuan minute 16-naah corner aṭanga ball kal chu ṭha zetin a tauh goal. Chawnpuiin MC-a bakah tawnhriat nei ṭha Lalliansanga (Notea) an kawl a, Aizawl FC forward hlui hi a hunah tak a rawn che ṭha bawk.

Notea hian box pawnah Venghnuai player-ten an hual chungin ball a hum thei a, freekick a hlawh chhuak. Chanmari FC leh Aizawl FC laka freekick pet goal tawhtu MC-a rawn pen chhuakin crossbar a pet per a, hemi per hian keeper Joel B. Lalramchhana dan tuma dive hnung lam chu fuhin goal-ah a lut.

Minute 30-naa goal hi MC-a khung angin puang mah se match official ten own goal angin an ziaklut. Eng ti zawng pawhin dah se MC-a hnathawh ropui sawi nep a thiang chuang lo.

Venghnuai an tho
Chawnpuiin 2-0 a hma an hruai avangin an dinhmun a ṭha a, amaherawhchu an khingpui Venghnuai hi Aizawl FC laka 3-1 a nih hnua tho chhuak leh thei kha an ni. Venghnuai mipuiin an player-te an hre chiang a, beisei an neih tlat avangin an thawm a la ṭha tho.

First half injury time-ah Venghnuaiin lawmna tur an nei ta a, Mizo player ball pet thiam bik Vanlalthanga'n hla tak aṭangin freekick aṭangin a khung. Hualngohmun midfielder Thanga hian Police lakah pawh freekick ṭha takin a lo khung tawh a, vanneih goal a ni lo.

First half a tawp zui a, Venghnuai an phur thar hle. Halftime-ah coach Lalrindika Hmar-in a tihtur a ti a, second half-ah Venghnuai game a mawi sawt. Rindika hian first half tawp hmain C. Ngurnuntluanga a luhtir a, hei hian second half tawp lamah game a thlak ṭan tawh hrim hrim bawk.

Venghnuaiin Chawnpui an nawr na a, an phu angin goal an sual chhuak. Kolasib tlangval H. Lalrempuia'n box chhungah ball per chang fuhin rilru fim takin goal-ah a chantir a, minute 58-naah 1-1 a ni. Venghnuai defender Rempuia hian semifinal-ah Aizawl FC lakah chakna goal a khung tawh bawk.

Rindika Hmar hoten inkhel an thunun zui a, Chawnpui an che thei tawh lo. Venghnuai hun inher chhuak ngei tura ngaih ni tawh mah se Chawnpui tlarhnungah captain Lalrinchhana Tochhawng leh a hote an ṭang khawng ve tlat. Hun pangngaiah goal a luh belh lo a, extra time-ah Chawnpui insiamṭha mah se goal hmuh tur a awm chuang lo.

Penalty chu
Coach Sanga leh Rindika Hmar ten vanneih dan tur kawng an zawng a, extra time zawh hma hretin goalkeeper an thlak ve ve. Venghnuai tan R. Malsawmkima a rawn tlan lut a, Chawnpui tan Lallawmzuala a rawn lut bawk.

Goalkeeper thlak vangin penalty boruak a sang sawt a, entu an tam avangin pressure a tam viau bawk. Chawnpui tana pet hmasa pali MC Malsawmzuala, Lallawmsanga, Laltlanzova leh Malsawmdawngkima Boitlung ten an khung vek a, Venghnuai tan Lalnunsiama, Vanlalthanga leh Lalruatfela ten khung mah se a vawi thumna pettu Lalruatfela (RF-a) pet chu Zolawma'n a dansak.

Chawnpui tan Hriata a rawn pen chhuak a, Khawlailung tlangval hian tawlhthlu chungin penalty pet mah se Venghnuai keeper R. Malsawmkima bum thoin champion-na goal a khung.

Mittui inang lo
Team pahnih boruak a dang ta daih. Chawnpui lam lawm avangin an ṭap a, chak loh vanga rilru nat vangin Venghnuai an ṭap thung. Venghnuai team chhungah inhnem tur bik an awm lo a, best defender dawngtu Ruatfela'n a chet dan hmangin mimal lawmman ni loin champion nomawi a duh tih a pholang a, coach Rindika pawhin a mittui a dang zo lo.

Coach Rindika Hmar chuan, "Sawi tur ka hre rih lo," tiin Vanglaini zawhna a chhang a, sawi thei dinhmunah a ding lo a, an tum ram an thlen loh avangin a rilru a na takzet. Lawmman dawng turin Venghnuaiin stage an pan laiin Chawnpui player-ten 'guard of honour' an lo pe.

Chawnpui chet dan a mawi a, Venghnuai player-te pawhin 'guard of honour' an pe leh a, infiamna ropuina a lang. Chawnpui coach Lalsangzuala Hmar chuan, "Kan vannei a ni. Pathian ropui ber se, amah vanga champion kan ni. A dawtah chuan H. Vanlalthlanga chungah bawk lawmthu ka sawi duh a, Pathianin Thlanga bula min hruai avangin tun dinhmun hi ka thleng a ni," tiin MPL club pathum champion pui theitu coach chuan Vanglaini a hrilh.