Spain tan World Cup a tawp ta

World Cup thawnthu ngaihnawm hrilhin kan awm leh ta - Nilaini zan khan Spain-in Morocco lakah goal an khung thei lo a, hun pangngaiah 0-0 in an inhnehtawk.

Minute 30 dang an inkhelh hnuah pawh goal a la luh loh avangin penalty hmanga chak zawk zawn a ni a, Spain-in penalty-ah meuh pawh goal an la khung loh cheu avangin penalty-ah Morocco hi 3-0 in an chak.

Morocco tan goalkeeper Yassine Bounou chu a changtupa a ni a, Sevilla keeper hian Carlos Soler leh Sergio Busquets te pet a dang a, Pablo Sarabia chuan post a pet per bawk.

Atlas Lions (Morocco sawina) tan Achraf Hakimi, Hakim Zeyich leh Abdelhamid Sabiri ten an khung a, Badr Benoun-a'n pet goal lo mah se Spain lamin an khung loh vek avangin an chak ta tho.

Morocco-in an ram chanchina a vawi khat nan World Cup quarterfinal an lut a, Cameroon (1990), Senegal (2002) leh Ghana (2010) hnua African ram zinga World Cup quarterfinal khel leh thei hmasa ber an ni.

December 10, zan dar 8:30-ah Morocco hian World Cup semifinal luh beiseiin Portugal an hmachhawn dawn a, 6-1 ngawta Switzerland hnehtu team laka hnehna chan hi a awlsam lo ang.