Switzerland sawptu Portugal an tlang

Portugal coach Fernando Santos-a'n a captain Cristiano Ronaldo chu inkhel bul ṭantu zingah a telh lo a, tawnhriat ngah lo Goncalo Ramos a thlang zawk - Ramos hian Switzerland lakah hattrick siamin a hming a chher nghal hle.

Thawhlehni zan World Cup last 16 inkhelah, team ṭha Portugal hian Swiss team 6-1 in an sawp. Ramos-a'n goal thum a khung bakah defender Pepe, Raphael Guerriero leh Rafael Leao te chuan goal khat ṭheuh an khung bawk.

Portugal hian nuamsa takin quarterfinal an lut a, semifinal thleng tur chuan Morocco an hneh a ngai dawn. Last 16 inkhel dangah Morocco hian Spain an lo pet chhuak ve bawk a ni.

Ronaldo tel lohna
Inkhel ṭan hma darkar khatah bul ṭan tur player puan chhuah a ni ṭhin, tun hnai boruak vangin Ronaldo chungchangin ngaihven a hlawh a, rin theih ni si, mahse rin ngam chiah ni si lohin Ronaldo chu thlan chhuah 11 zingah a tel lo.

Lusail Stadium-a inkhel en tum te chauh an ni lo, mahni awm hmun aṭanga TV kaltlanga Portugal leh Ronaldo inkhel en tum tam tak hrilh a hai, coach Santos thutlukna chu a fuh dawn em tih an thlir ṭhup.

Portugal che fuh lo ta se, a bik takin goal khung kawngah harsatna nei ni se coach Santos hian dem rawn a hlawh dawn, coach tawnhriat nei ṭha hian a chunga thil thleng thei zawng zawng a ngaihtuah hmasa vek ang tih a chiang, chumi hnua thulukna pawh siam a ni.

Kum 37 mi Ronaldo hi an match hnuhnungah pawh thlak a ni a, hemi ṭum hian a lungawi lo nia sawi a ni. Coach tan chuan, ram tana feh chhuak ni sia lungawi lo chu hriatthiam a harsa deuh a ni mai thei, boruak ṭha lo dang erawh a lang lem lo.

Goal ruk a lut
Inkhel tura player lut zingah Ramos hi hming langsar lo zinga mi a ni, atan Portugal jersey ha chunga inkhel bul a ṭanna hmasa ber a ni. Ronaldo a awm loh takah chuan Joao Felix chu mipui mit fukna a ni.

Mahse, minute 17-na lekah Ramos hian angle zim angreng tak aṭangin kawh zetin a hlap lut pawp a, a hnu lamah a hawi kir leh tawh lo. Felix nen an inkawp rem rem a, a tlan tamin defender a chhaih buai hneh takzet.

Chawlhlawk hmain defender Pepe-a'n Bruno Fernandes siamsak a khung a, kum 39 mi Pepe hi World Cup knockout round china goal khung thei upa ber a ni hial - Brazil laka tlarhnung inrem phui ṭha tak Swiss team an talbuai hle.

Second half-ah pawh thawnthu a danglam lo. Ramos-a'm goal hnih a khung belh a, hattrick a siam bakah Guerreiro tan a siamsak bawk! Manchester City defender Manuel Akanji-a'n goal khat sut ṭhen mah se, hun tawp dawna Rafael Leao khungin Portuguese team chungnunna a nemnghet.

Swiss an zawr
Switzerland hian player langsar fal tak tia sawi tur an nei hran lo, mahse an team thawhhona ṭha leh coach Murat Yakin-a'n a naute a remkhawm thiam em avangin fak an hlawh a, last 16 an thleng kha thil mak a ni hran lo.

Mahse, ball thiam rual Portuguese player lakah an che hleithei lo, match hmasa lama Brazil an dan tum ang ngawtin an nghet thei lo. Tawnhriat nei ṭha Xherdan Shaqiri a che hleithei lo a, keeper Diogo Costa tan hna harsa pawh an siam lo tluk a ni.

Swiss coach Murat Yakin chuan, "Kan khingpuite kha an che rang zawk a, an tlan chakin an goal nawr a na zawk tih kan pawm a ngai, a tir lama tlarhnung phui lo zeuh kha na takin min nghawng," tiin a sawi.

Switzerland hian World Cup vawi ruk an khel tawh a, heng zinga pangaah hian last 16-ah an tla. Team khawng leh thiam pangngai tak ni mah se, inelna boruak sang chinah an ruh a no leh deuh tlat ṭhin tih a lang.

Ronaldo aiawhtu Goncalo Ramos
Inkhel ṭan hmain eng vangin nge Cristiano Ronaldo-a'n bul a ṭan loh, tih chu titi a ni a, inkhel a zawh meuh chuan hattrick siamtu Goncalo Ramos kha tu nge a nih tih chu football khawvel titi a ni chhunzawm.
Kum 2008 hnua a vawi khat nan, ram leh ram inelna lianah Ronaldo chu Portugal starting XI zingah a tel lo a ni a, thlalatu lamin mual sira a ṭhu lai an veh luai luai kha thil mak a ni hran lo.

Mahse, mi tam takin an la hriat lar loh Ramos khan Ronaldo hnathawh ai zawng zawng hneh sawh takin a thawk thei ta si, thutlukna siamtu coach Fernando Santos demna tur lo chang ran tute pawh an ngawih rih a ngai.

Ramos kha kum 21 leh ni 169 mi chauh a la ni a, Hungary player Florian Albert (1962) hnu lamah World Cup-a hattrick siam thei naupang ber a ni hial a, miten tu nge a nih an hriat theih nan khelmualah minute 17 bak hun a mamawh lo.

A goal hmasa ber kha a pet nat em avangin Swiss keeper Yann Sommer tan dan ngaihna a awm lo. Defender Diogo Dalot-a siamsak a khung pawh tawih tak a ni - hattrick siam nana Joao Felix pass a khung kha chuan inrintawkna a nei sang tawk tawh tih a chiang.

World Cup goal riat a khelh aṭangin Ronaldo-a'n goal riat a khung a, knockout stage chinah a la khung miah lo. Ramos erawhin a match khatnaah goal thum a khung nghal a, player pahnih hi khailhin chi ni lo mah se a chanchin an sawi zui luai luai hi a mak hran lo.

Benfica aṭanga inzir chhuak hian Switzerland nen an inkhelh hma khan, an ram tan friendly match-ah minute 23 a khel tling tawh tih bak sawi tur a nei lo, tunah chuan World Cup-ah hattrick a siam miau a, quarterfinal-ah a hmel kan hmu chhunzawm ngeiin a rinawm.

Buaina a awm lo!
Cristiano Ronaldo chungchangah Portugal coach Fernando Santos chuan zawhna a dawng hnem, mahse chhanna erawh a ngai reng a ni. Coach leh captain inkarah buaina a awm lo tih chu Santos ka aṭanga chhanna a ni.

Bul ṭantu zingah a tel lo chungin stadium chhunga inkhel entuten Ronaldo hming an lam ri nasa a, minute 73-naah Joao Felix thlaka a rawn luh dawn lai phei chuan fans thawm a ring hem hem hle. Ronaldo hian captain armband a rawn hreng zui a, goal pawh a rawn khung - mahse offside vanga hnawl a ni. Inkhel pawimawh takah coach-in ring zo lo mah se, atan international match a zo ta tihna erawh a la ni kher lo.

Portugal coach Santos chuan, "Ronaldo nen kan inkar hi zawhna ka dawng zing tawh, kum 19 mi lek a nih laia Sporting player a nih khan ka hre daih tawh. Kan inkarah inhriatthiam lohna leh buaina a awm ngai lo.
"Kan team player pawimawh zinga mi a ni reng a, khawvel player ropui berte zinga mi niin a hlutna pawh kan hria. Match khat atan thutlukna leh kan tih tur ang chu a zo tawh," tiin Ronaldo nen an chungchang a sawi.

Team a khelh tir dan chungchang sawi zuiin Santos chuan, "Team game nung tak, rang taka ball in pekual thei leh insiamsak tawn thei tur kan mamawh, chumi atan chuan Ramos kha a ṭangkai hle. "Cristiano hi player kawng leh hlauhawm tak, a bik takin box chhunga hlauhawm bik a ni. Mahse, tuna Swiss team kan hmachhawn atan kha chuan Goncalo Ramos khan a hna a tlin," a ti a, a player hruai zawng zawng chu bul ṭantu zinga tel thei an nih vek thu a sawi bawk.