Vawiin tlai dar 2:00-ah NorthEast Derby Aizawl FC Vs Neroca FC

Vawiin tlai dar 2:00 hian RG Stadium, Mualpuiah Aizawl FC-in Neroca FC an mikhual ang. Mizo club-te hi table-ah pariatnaah an awm mek a, Neroca hi an chung chiahah awmin an inthlauhna hi point khat chauh a ni.

Tun season I League champion hian season tharah Indian Super League an khel dawn a, Mizo club tan champion tur chuan chetsual a thiang tawh lo. Vawiin hian Mizo club hi an mualah an khel dawn a, Neroca lakah hian point thum hlawhchhuah a ṭul hle.

Aizawl FC hian Standly Rozario hoin November 21 khan RG Stadium-ah Sudeva Delhi 2-1 in an hneh a, an phur thar hle. Amaherawhchu head coach Standy hi damlohna avangin a haw a, Mizo club-in result ṭha an neih chhunzawm lo.

MPL9 semifnal-ah Aizawl FC hian player kima khel chungin Venghnuai FC an hneh lo a, I League lamah zin chhuakin RoundGlass Punjab laka an chak loh hnuah Churchill Brothers nen an inhnehtawk.

MPL8-a Aizawl FC champion puitu Standly Rozario hi inenkawl rei a ṭul avangin Mizo club nen hian an thawkdun thei dawn lo a, Aizawl FC-in nimin khan inhriatthiam tawnnaa an inṭhen thu an puang. Mizo club hian coach thar an nei thuai dawn a, inbiakna pawh thui tak an nei tawh. Chutihrualin Neroca lakah erawh Mizo coach pahnih Victor Lalbiakmawia leh Lalrozama Fanai ten an ho dawn a, hming an chher nan an chak a ṭul hle.

Aizawl FC-in Mizo mipui thlawpna an mamawh a, tun season-ah champion ngei tumin inelna ṭan hmain foreign player pawh an nei kim. Mizo club tan chanchin lawmawm a awm a, striker zinga hming langsar ber Henry Kisekka-a'n Churchill lakah goal a khung a, goal a khung chhoh zel beisei a ni.

Mizo club khingpui tur Neroca pawhin result ṭha an nei lo. Manipur club hi vawi hnih chiah an la chak a, an hneh hi table mawngphaha awm Kenkre leh Sudeva Delhi te an ni a, goal khat ve vein an chak. Inkhel dang pathumah erawh Neroca hian Real Kashmir (0-1), Mohammedan SC (1-3) leh Rajasthan FC (0-1) te an hneh lo a, Mizo club tan Manipur club laka point thum hlawhchhuah hi a pawimawh hle.