MPL Mimal Lawmman
Best Goalkeeper:F. Lalmuanawma, Mizoram Police
F. Lalmuanawma hian MPL6-ah khan Chanmari FC champion puiin best keeper chawimawina hi a dawng tawh. Tun season-ah Muanawma hi Mizoram Police tan khelin season bul a ṭan ṭha a, man of the match pawh ṭum hnih dawngin team innghahna a tling. Amaherawhchu tun dinhmuna Mizoram no. 1-a chhal ngam Muanawma hian Police semifinal a thlenpui lo a, vawi kua ngawt clean sheet neitu RS Lallawmzuala erawh a vanduai. Lawma hian Chhinga Veng semifinal a thlenpui a, mimal chawimawina dawng tur erawhin a nghah rih a la ṭul thung.
Best Defender: Lalruatfela, FC Venghnuai
MPL best defender dawngtute hi an hrawl ṭhin hle. Santosh Trophy-a Mizoram champion puitu Zothanpuia'n (Thangpuia) ṭum hnih a dawng a, Lalrinchhana Tochhawng bakah ISL-a khel zui ta R. Laldinliana leh Laldinpuia ten ṭum khat ve ve an dawn bakah AFC foreigner Emmanuel Chigozie leh Juuko Richard Kassaga ten ṭum khat ve ve an dawng bawk.
Tun ṭum nominee-ah Aizawl FC captain Lalchhawnkima leh Chawnpui FC captain Rinchhana te an awm chungin best defender atan Lalruatfela thlan a ni. Ruatfela hi defender thahrui ngah a ni a, Mizoram Police leh Electric Veng an hmachhawn ṭumin man of the match-ah thlan a ni a, semifinal-ah Aizawl FC lakah goal ropui a khung. Final-ah penalty shootout-ah goal khung mah se a vanduai zawkah an ṭang.
Best Midfielder: K. Vanlalhriatzuala, Chawnpui FC
K. Vanlalhriatzuala hian Inter Village Football 2022-ah Khawlailung tan rawn khelin hming a rawn chher a, Serchhip lamah erawh player hriat hlawh tak a ni tawh. Pumruaah lian lo mah se Hriata hi MPL9-ah a hmuhnawm ṭhin a, best midfielder dawn hi a phu hle. Hriata hi ṭum thum man of the match-ah thlan a ni a, round 14-a Mizoram Police laka point thum hmuh ngei ngei a ngaih ṭumin goal a khung a, semifinal-a Chhinga Veng an hnehna kawngah pawh a thawh hlawk. Khawlailung tlangval hi penalty aṭanga Chawnpui chakna goal khungtu a ni.
Best Forward leh Top Scorer: MC Malsawmzuala, Chawnpui FC
Chawnpui FC champion puitu striker MC Malsawmzuala hi kum zawnin MPL top scorer a ni a, Mizoram Police forward Lalbiakhlua leh Lalfakzuala te nen huang khatah dah theih an ni. Siaha tlangval MC-a hian goal a khung satliah lo a, goal pawimawh a khung.
MPL chawhma lamah khelh ṭha tawk lo mah se round 7-a Chanmari an hneh ṭumin goal hnih a khung a, he goal hnih hi Chawnpuiin semifinal khelh an beisei ṭannaah a ngaih theih. League round-ah MC-a goal hi awm lo ta se Chawnpui hian point riat an hloh dawn tihna a ni a, semifinal an khel pha dawn lo. Final-ah MC-a'n goal hnih a khung bakah penalty shootout-ah a pet hmasa ber niin chiang takin a khung.
Siaha tlangval MC-a hian goal 10 khungin top scorer a ni a, a hnaih bertu Malsawmfela'n goal sarih a khung. Chawnpui forward MC-a hian best forward pawh a phu a, chutihrualin best player atan thlan a nih tak loh avangin F. Lalrinpuia record a nih rual thei ta lo. Valpuia hian MPL4-ah Aizawl FC champion puiin mimal chawimawina mi pakhatin a hui theih ang te a hui vek.
Best Player: Lalrinchhana Tochhawng, Chawnpui FC
Mizo captain zinga hriat hlawh zinga tel pha Lalrinchhana Tochhawng hun a inher chhuak ve ta. Rinchhana hian Chanmari FC (2), Chhinga Veng (1), Aizawl FC (1) leh Chawnpui FC (1) tan MPL nomawi a chawi tawh a, best defender atan thlan pawh lo ni tawh mah se best player atan thlan a la ni lo.
MPL9-ah Rinchhana Tochhawng hun a inher chhuak a, khelmuala hruaitu ṭha bik Chawnpui captain hi awm lo se Chawnpui FC hi an champion theih a rinawm loh. Mizoram captain pawh lo ni tawh Rinchhana hi man of the match-ah pawh ṭum thum thlan a ni a, best player atana thlan hi a phu hle.