Hahdam takin ka en thei lo ang - Townsend-a pa

Premier League khelh chhunzawm theih a beiseiawm a, June 12-ah inelna hi ṭan thei turin ruahmanna an siam chho mek. Football ngainatute thlir dan a phir a, inelna ṭan thuai thuai se tih an awm laiin nunna thapa inkhelh ṭha ti lo an awm ve ṭeuh bawk.

Crystal Palace leh England winger Andros Townsend pa Troy pawhin hemi chungchangah hian a ngaihdan a sawi chhuak. Troy Townsend chuan, "Ka fapain football a khel hi hmuh nuam ka ti a, an team khel ka enin ka hlim a, football leh a kaihhnawih hrim hrim hi ka ngaina. Amaherawhchu tun dinhmunah chuan en nuam ka ti dawn lo - ka hlauthawng takzet a ni," tiin a sawi.

Andros Townsend-a pa chuan sawi chhunzawmin, "Kei pawhin hahdam taka ka en thei lo a nih chuan nu leh pa tam tak pawh an ni ngei ang. Zirchianna lamah mi hang tan a hlauhawm zia kan hre chho leh zel si a, tunlai boruaka ka fapa inkhel tur hi suangtuah pawh ka duh lo," tiin nunna thapa inkhelh a ṭul lo a tih thu a sawi.