Mizoramah 'high altitude training centre' dah kan tum ang - AIFF President

India rama football thuneitu sang ber All India Football Federation president Kalyan Chaubey chuan Honda MPL9 final a rawn thlir a, Mizorama 'high altitude training centre' dah an tum thu a sawi.

Final zana khuallian Kalyan Chaubey chuan, "Mizoram sorkarin football hmasawnna turin theihtawp a chhuah dawn a, hei hian min tilawm hle. Engtik niah emaw chuan India ram football-ah Mizoram hi hmahruaitu an la ni ang. AIFF chuan technical support ṭul ang zawng zawng a pe ang," tiin a sawi.

Mizo football ngainatute tan chanchin lawmawm sawi zuiin Kalyan Chaubey chuan, "AIFF President ka nihna angin Mizoramah 'high altitude training centre' pahnih kan dah ang. Coaches education programme kan buatsaih ang a, FIFA nena ṭangkawpin football zirna grassroots changtlung zawk kan buatsaih ang," tiin a sawi a, mipui thawm pawh a ṭha hle.

MPL9 final zan hi Mizoram sports minister Robert Romawia Royte pawhin a chhim a, Sports Minister chuan, "Mizoram football-in hma a sawn theih nan kan theihna zawnah theihtawp kan chhuah zel ang," tiin a sawi.

MFA Ground a tlawh
Zan khat riaka lo zin AIFF president Kalyan Chaubey chuan nimin chawhma lam khan MFA Ground, Sairang Dinthar leh a bula hostel sak zawh tawh a tlawh.

AIFF President chuan MFA-in ama puala khelmual a nei chu a lawmpui a, FIFA Forward Project hmanga sak a nih angin MFA leh AIFF ṭangkawp hmalakna rah chhuah a ni tih sawiin, "Mizoramin player ṭha a chherchhuah chhunzawm zel ka beisei," a ti a; MFA hnathawh ṭhat avanga lawmmana AIFF-in an pek a nih thu MFA hruaituten an lo sawi bawk a ni.

Kalyan Chaubey chuan, "Hei hi training-na hmun ṭha a ni a, a ṭangkai theih dan ber tur ngaihtuah a, a ṭul chuan national level thlenga chhawr dan kan ngaihtuah ang. Tuna a ṭul hmasa chu khelmual ṭha neih hi dim taka hman a, ṭha taka enkawl a, tlo taka neih tum a pawimawh," tiin a sawi.

MFA chu state team leh club lam tana MFA Ground hmang ṭangkai zel turin a chah a, MFA-in expert an mamawh a nih chuan AIFF aṭanga tirh theih a nih thu a sawi. AIFF President hian nimin chawhnu khan New Delhi panin Lengpui Airport a chhuahsan a; kum tharah project ṭha tak nen Mizorama a lo zin leh tur thu a sawi.

Kalyan Chaubey chuan MFA Ground an tlawhna thlalak chu twitter-ah a dah chhuak a, AIFF President chuan, "Helai hmun hi Indian Football-in high altitude training nan an la hmang ṭangkai ang," tiin a ziak bawk.