Thawnthu ngaihnawm min hluitu Morocco
Spain boss Luis Enrique-a'n football chu ennawm nen a tehkhin a, "Coach-in a hriat hmasak ber tur chu football hi 'show' a ni a, mipuiten hmuhnawm ti takin an thlir tur a ni," a ti ṭhin.
Mahse, Thawhlehni zan inkhel pawimawhah Spain-in anmahni ṭantute tan ennawm an chhawpsak thei lo a, Morocco laka goal an khung loh hnuin, penalty-ah 3-0 in an tlawm - mak tak a ni.
Ennawm chhawp duhtu Enrique khan sawisel a hlawh zui a, Spanish team khelh dan chu fans ṭhenkhat chuan, "Thil ninawm tak a ni," tiin an sawi hial a, ball inpe tam mah se a hmawr bawktu ṭha an neih loh avangin an thamral.
Enrique-a'n football hmuhnawm a tih chu Morocco-in engmah lo maiah an chantir a, engtikah nge Spain an ropui leh ang, tih chu zawhna, a chhanna pek harsa tak a ni ta.
Tuma chiang
Enrique-a'n a naute a khelhtir dan tur chu hriatsa a ni a, a hnung lam aṭanga ball inpe kualin, a tawpah ṭha taka hmawr bawk tumin an khel dawn - hemi dan chahna ṭha ber chu game hmuhnawm khelh tum kher loh a ni!
Morocco coach Walid Regragui-a'n hei hi a hrechiang a, 4-3-3 formation-in a team rawn rem mah se 4-1-4-1 emaw 4-5-1 emawin an formation an thlak ṭhin a, mual laiah Spain chu ball inpek tam lohtir a, mual sir lamah pawh an tum.
Atlas Lions hian an ṭhatna an hrechiang a, an full back pahnih Achraf Hakimi leh Noussair Mazraoui hmanga mual sira rorel a, counter-a rang taka Spain nawr let chu an tum dan a ni - Hakimi hi Paris Saint-Germain right back a nih laiin Mazraoui hi Bayern Munich player a ni thung.
Spain-in heti chung hian ball an inpe tam tho a, mahse, Morocco tlarhnung thawk ho ṭha lutuk sut hawn an harsat a, first half chhungin vawi khat chiah shot an nei thei - kum 1966 (data awm hnu) hnua World Cup game-a minute 45 chhunga shot an neih tlem ber a ni.
A har a ni!
Education City Stadium, Al Rayyan chu Morocco khelmual emaw tih mai turin African team ṭantuten an mawi hneh a, an thawm ringawt pawh tawnhriat la nei tam lo player tan chuan zamna tham a tling.
Hetiang boruak karah hian Spain player-ten khelh an harsat a, Morocco player-ten an tih tur an hriatchian bawk avangin chance mumal an insiam hleithei lo - Spain-in ball an chang a, Morocco an inveng thung!
Spain chance neih tam lo takah pawh Morocco tan keeper Bounou a rintlak ṭhin a, Dani Olmo chance neih vawi hnih chu ṭha takin a dansak ve ve a, minute 123-naa Pablo Sarabia-a'n post a pet per uiawm tak a ni.
Morocco hian chance nei lo an ni bik lo. Mahse, ven loha awm Nayef Aguerd-a'n uiawm takin a tauh goal lo a, Mazraoui long shot chu Unai Simon-a'n a dansak a, yard riat vel lek aṭangin Walid Cheddira chuan Simon-a zawnah a pet bawk.
A tawpna chu
Goal khung tum Spain-in 77% ball chang mah se awmze neiin Morocco tlarhnung an ṭhiat thei lo a, vawi 13 shot an neihah vawi khat chiah target-ah a kal - hemi ngaihtuah chuan 0-0 a inkhel hun pangngai a tawp kha thil awm tak a ni.
Spain coach Enrique-a'n Morocco nen an inhmachhawn hmain vawi 1,000 vel penalty pet an zir thu a sawi a, mahse, an zir dan a fuh tawk lo nge, player pathumin an pet goal lo vek!
Spain tana pet hmasa bertu Pablo Sarabia chuan post a pet per a, Carlos Soler leh Sergio Busquets te pet chu Morocco keeper Bounou chuan a dansak bawk - Atlas Lions tan Abdelhamid Sabiri leh Hakim Zeyich ten an chhuih luh hnuah Badr Benoun-a'n pet goal lo mah se Spain tan Busquets-a'n a hlah ve leh a, Morocco chance a ṭha takzet.
A tawpah Morocco tan Spain-a piang leh seilian, Real Madrid academy aṭanga inzir chhuak Hakimi a lo pen chhuak a, a seilenna ram chu puanthuah tela hawtir turin penalty a chhuih lut - Morocco an chak a, chenna ngai loh ram an fang zel e.