Thutlukna ngai bawk ka siam leh ang - Enrique

Spain tana penalty pettuten an pet goal lo vek a, heti chung hian coach Luis Enrique chuan thlang ṭha leh thei pawh ni se, a player ngaite bawk kha penalty pet tura a thlan tur thu a sawi.

Enrique chuan, "Khelmuala awm, penalty pet thiama ka ngaihte pet turin ka thlang a ni. Thil thlak danglam thei ta ila, Morocco keeper Bounou kha ka la chhuak ang a, keeper dang ka dintir ang. Ka ngaihdan chuan penalty hi vanneih leh vanduai inkar a ni lo a, mahni inthunun theih a ni.

"Game kan thunun viau a, mahse, goal kan khung thei lo - chu chu thil nihna dik tak a ni a, thudik a ni bawk," a ti a, thil thlak danglam thei pawh ni se Morocco keeper zawk a thlak tur thu a sawi!

Kum 52 mi Enrique hian kum 2018 aṭang khan Spain team hi a enkawl ṭan tawh a, nakkum nipui thleng La Roja enkawl turin contract a la nei - he thu buatsaih a nih lai hi chuan Enrique-a'n chhuah tumna a nei lo.

Enrique chuan, "Karlehah ka hma hun kan sawi dawn a, tun dinhmunah chuan contract chungchang lo sawi a hun rih lo a, a mawhphurtu ka ni. Thutlukna hi keimah maia ka siam tur chu ni se, Spain hi ka dam chhung zawnga enkawl ka duh ang.

"Mahse, chu chu thil nihphung a ni si lo. Hahdam takin, kei leh Spain tana ṭha ber tur ka ngaihtuah a ngai a, thil thleng dante pawhin ring takin thu a sawi ve bawk ang chu," a ti a, Spain a enkawl zui lo a nih pawhin a mak lo ang.

Spain hian inkhelh chhung khan vawi 1,019 pass an nei a, heng zinga 926 chu an tidik thei - Morocco khan vawi 304 chiah ball an in pass ve a, mahse, penalty-ah an chak zawk miau si!

Coach luhlul ve tak Enrique hi Spain-ah a cham a nih chuan an khelh dan a thlak a rinawm lo - mahse, Morocco lakah an chetsual pui a, goal an khung theih lohin a thlakna tur system dang an nei lo.

Spain hian 2008-12 inkarah khan Luis Aragones leh Vicente del Bosque enkawlna hnuaiah international football an thunun a, khatih chhung khan World Cup (2010) nomawi chawiin, Euro-ah a zawnin an champion a, mahse, kum 2012-a Euro nomawi an chawi hnuah champion an nei leh ta lo.

Enrique hnuaiah Euro 2020 semifinal an khel a, World Cup round of 16 aṭangin an tla leh bawk - Spain kal zel dan tur hriat a châkawm a, tho leh thei tak ang maw? tiin zawhna an inpe mek e.