Indian Super League an khel leh dawn ta

Zan thum zet Indian Super League khelh a nih loh hnuah zaninah khelh ṭan a ni leh dawn ta a, zanin dar 7:30 hian ATK Mohun Bagan leh Jamshedpur FC an intawng ang.

Team pahnih hian tun season-ah beisei an phak lo - season hmasaa league round hmahruaitu ni thei Jamshedpur hian match riat an khelh tawhah vawi khat chiah hnehna an la chang a, vawi khat team inhnehtawkpuiin, vawi ruk tlawm an nei.

Season hmasa an thawnthu nen chuan inthlau tak a ni - Men of Steel tan playoff khelh beiseina nei turin tlawm a thiang tawh lo a, ATK Mohun Bagan aṭanga bul an ṭan theih chuan beiseina sang tak an nei thei ang.

Mohun Bagan hi Jamshedpur ang emin che chhe lo mah se, an sum sen hnem dan leh player langsar an kawl hnem dan ngaihtuah chuan tun aia ṭha zawka khel tur an ni - coach Juan Ferrando tan pressure nei lo turin chak a ṭul.

Kolkata club hian match riat khelh tawhah vawi nga hnehna an chang a, vawi khat draw neiin, vawi hnih an tlawm. Zaninah an tlawm chuan top four-a an dinhmun a nghing thei dawn a, Kolkata club tan tlawm a thiang lo.

Jamshedpur hian Mizo player, defender Ricky Lallawmawma, Laldinliana Renthlei leh Laldinpuia Pachuau te an kawl a, Mohun Bagan-in Lalrinliana Hnamte (Terina) an kawl bawk.