Hlim takin Brazil an lâm - an sawisel!

Brazil-in World Cup quarterfinal lut turin South Korea chu 4-1 in an sawp a, goal an khung apiangin lam chungin an lawm - Richarlison-a'n goal a khung phei chuan a goal khung lawm nan Selecao bench lamah a tlan phei a, coach Tite-a'n a player-te hi lo zawm vein an lam ho.

Tite chuan, "Player-te nunphung zawm ve kan duh. Kum naupang tê chauh an la ni a, an nun dan ang hrethiam tura awm ka tum ve mai a ni - chung zingah chuan lam pawh hi a tel," a ti a, a player-te nen an inpawh zawk nana an tih anga ti ve mai a nih thu a sawi.

Brazil player-te hi an lam avangin ṭhenkhatin an sawisel a, an khingpuite laka zahna lantir tawk loah an puh. Manchester United legend Roy Keane chuan, "Khatianga lam kha chu ka pawm lo.

"Hnam tihdan phung a nih thu an sawi pawh ka hria a, mahse, kei chuan khingpuite zah lohnaah ka ngai a ni. Goal li zet an khung a, an khung apiang khan an lam ringawt," a ti.

Keane chuan sawi zawmin, "Vawi khat tih mai kha chu ka hrethiam a, mahse, goal khung apianga tih erawh ka hrethiam lo. Manager Tite meuh pawh a tel ve a, ka ngaihdanah chuan thil ṭha lo tak a ni," tiin a sawi.

Mahse, kum 61 mi Tite chuan an lam chungchang chu sawifiahin, "Mi ṭhenkhat, rilru kawi tak pute chuan kan khingpui ka zah tawk loah min puh ang. Mahse, kan goal khung avanga kan hlim em avanga kan lawmna tihlan vena mai a ni a, a bak a awm lo," a ti.

Tite chuan sawi zawmin, "Kan khingpui zah lohna a awm lo a, South Korea coach Paulo Bento pawh ka zah em em a ni," a ti a, rilru dik lo an put loh thu a sawi.