Jesus an zai hlawhtling

Arsenal forward Gabriel Jesus chu a khup hliam zai a ni a, zai hlawhtling viau mah se a chawlh chen tur sawi chian theih a la ni lo. Gunners tan chuan Jesus inhliam hi channa lian tak a ni thei dawn.

Kum 25 mi Jesus hi Brazil leh Cameroon ten World Cup group match hnuhnung ber an khelh ṭumin a inhliam, ani bakah hian Alex Telles chuan a khup dinglam a hliam ve bawk a ni.

Brazil match hmasa pahnihah Jesus hi bench aṭangin a lut, inkhel bul a ṭanna hmasa berah a inhliam a, atan World Cup a tawp zui nghal bawk - Arsenal tan kuminah a inlan a rinawm tawh lo bawk.

Arsenal chuan thuchhuah siamin, "Club chuan Gabriel Jesus hi kan thlahthlam lo a, a rang thei ang bera a inkhelh leh thuai theih nan duhsakna kan hlan, tunah chuan a hliam enkawl a ni ang," tiin an sawi.

Jesus hian nipui bazar lai khan Manchester City aṭangin Arsenal a zawm. North London club tan hian inelna hrang hrangah goal nga a khung a, a club thar hi Premier League hmahruaitu a nih pui mek.

World Cup a zo dawn hnai a, hun rei lote hnuah Premier League an khel ṭan leh tawh dawn. EPL hmahruaitu Arsenal hian Jesus hmun ruak luah tur hi thlasik bazarah an ngaihven a ngaiin a rinawm.