Premier League Training dan a chhuak - Tackle phal loh

Thawhlehni khan Premier League player leh manager-te hnenah training kalpui dan tur hriattir an ni a, social distancing dan an la ngai pawimawh hle. Tun dinhmunah player insik an la remti lo a, training-na a player insi tur chuan sorkarin thuchhuah a neih leh phawt a ngai dawn.

Training-naah hian tackling phal a ni lo a, player-te hi group khatah panga aia tam awm phal a ni lo. Training-na hmun, corner flag, ball, cone leh goal post thlengin natna hrik laka inven nan training zawhah thenfai zel tur a ni.

League thuneitute chuan Thawhṭanni aṭangin training ṭan theih an beisei a, training hi minute 75 chhunga khung len tur a ni ang. Dan kalpui sa angin kar khatah Covid-19 an vei em tih vawi hnih endik a ni ang a, training hmain zawhna chhan tur a awm ang a, an taksa lum leh vawh dan endik an ni bawk dawn.

Covid-19 kai tam zawkah chuan khawsik tenau a awm ṭhin a, chutihrualin player-te hian high-intensity emaw high-volume exercise emaw an neih dawn avangin endik dan tur hi a hrang hret dawn. 

Player zingah Covid-19 kai an awm erawh chuan lung leh chuap thlenga a nghawng dan endik a ni ang. Thuneitute hian medical dan chungchangah player-te thurawn an la tel a, zir chiang turin hemi chungchang ziahna phek 40-a chhah thawn vek a ni.

Thuneitu lamin player-te hi lirthei khata chuan an remtihsak lo a, an lirthei hi ngun taka tihfai ṭhin tura hriattir an ni a. Club lirthei leh mipui vantlang lirthei hman phalsak an ni lo. Hetia ruahmanna awm chho mek karah Professional Footballers' Association lakah zualko an awm ve tho a, inelna ṭan hreh zualte hi asthma vanga hriselna lama harsatna nei leh mi hang lam an ni.

Office for National Statistics zirchianna aṭanga a lan danin mi hang mipa leh hmeichha te hi coronavius vangin England leh Wales-a mi ngo aiin an thihna chance a let hnihin a tam. Nimin khan Premier League, medical staff leh PFA te an ṭhu khawm a, an thurel kan hre hman lo.

•    Liverpool-in champion turin point ruk chiah an mamawh tawh a, match hnih lekah an champion thei tawh tihna a ni.

•    Manchester City hi UEFA-in Financial Fair Play dan an bawhchhiat avangin 2020–21 leh 2021–22 season chhung an hnuaia inelnaah tel an phalsak lo. February 26, 2020 khan Man City hi Court of Arbitration for Sport (CAS) hnenah an zualko a, CAS thutlukna hian season thara Premier League aṭanga Europe inelnaa tel tur a hril ang.

•    Man City hi League Cup-ah an champion tawh a, hremna hi a kaltlang a nih chuan EFL champion quota chu league-a pasarihna hnenah hlan a ni ang.

•    Relegation Battle a ngaihnawm dawn - 18-naa awm Bournemouth-in point 27 an hmu a, Premier League khel zel tura him chin hi point 40 tihin sawi ṭhin mah se  chhiarkawp dan chuan a la dik lo. Chutihrualin club theihna nena thlirin tun dinhmuna point 40 hmu Arsenal hi chu him ngei tura ngaih a ni a, 10-na china awm Burnley tan ngaih ṭha taka awm a la rem lo.