Chhinga Veng vs Aizawl FC Lal thar a piang dawn em?
Mizoram Premier League Season 6-ah Chhinga Veng chu champion tura rinkai an ni a, nimahsela league round-a an hneh loh awm chhun chu final-a an hmachhawn tur Aizawl FC an ni!
Ṭha ber nih tumin zanin dar 7:30 hian Lammualah nomawi an inchuh dawn, 'Dream Final' en tum an tam avangin ṭhutna ṭha chang turin darkar khata kal hma a finthlak ang.
En man leh chhehvel
Final en man hi Rs 100 a ni a, team pahnih inbuatsaihna a ṭhat bakah nomawi inchuhna a nih avangin en man hi a to lo.
Aizawl FC hian team enkawl turin Portuguese coach Paulo Jorge Coelho Meneses leh Spanish coach Izan Martin Andres an lalut a, an team budget tur a hriatthiam theih nghal.
Paulo hi Spain-in FIFA World Cup leh European Championship an champion ṭum khan head coach Vicente del Bosque hnuaia coaching staff zingah a tel pha a, Mizo club-in a thiamna an chhawr chho mek. AFC hian I League nomawi humhim ngei an tum avangin Mizo player-ah pawh state pawna khel thlengin an ko let a, tualchhung player ṭha nen MPL nomawi la let tur leh I League nomawi humhim turin kum dang zawng aiin sum an seng nasa zawk.
Chhinga Vengin an elpui Chanmari FC aṭangin MPL champion puitu coach Lalsangzuala Hmar leh a assistant coach Anand Gurung te an lalut thei a, nikum Santosh Trophy-a Mizoram team enkawltu an nih bawk avangin player an khawm ṭha a, an mit it zawng an hlah meuh lo.
Tuna an foreigner kawl lai pahnih Lassi Adeyemi leh Olawale Olumide te pawhin khelna hmun an chang pha lo a, tualchhung player an nei ṭha tih a chiang. Final en man hi coach Sanga leh a naute thawhrimna aṭanga thlir chuan a tlawm hle.
1-na Chhingcows
Chhinga Veng hian MFA Super Cup leh I Day Football-ah match ruk ve ve khelin an chak vek. MPL league round-ah match 14 aṭangin vawi 10 an chak a, vawi thum an khingpui nen an inhnehtawk a, vawi khat chiah an chak lo. Chhingcows hi chiang takin league round-ah 1-na a ni a, amaherawhchu final-a an hmachhawn tur Aizawl FC hi vawi khat an draw bakah an hneh lo.
Chhingcows coach Lalsangzuala Hmar chuan, "Tun season-a kan record hi beisei phak bakin a ṭha a, kan lawm hle. Chutihrualin a tawp kan thleng lo a, kan hmabak kan zawh hi a ṭul a ni. MPL nomawi chawi ngei kan duh a, tun season-a kan hneh loh awm chhun Aizawl FC hneha kan champion chuan a hlu lehzual dawn," tiin Vanglaini a hrilh.
Sanga hian Chhinga Veng hi a champion pui a nih chuan head coach zinga MPL nomawi vawi hnih chawi thei hmasa ber a ni ang.
An inkhelh tawhna thlir letin Sanga chuan, "AFC nen kan inkhelh hmasak khan ni hnih training-na hun kan nei a, Police lâk hun nen an innan avangin awmze neiin training kan nei lo ve ve," tiin chhuanlam an neih thu a sawi a, final atan erawh inpuahchahna an neih ṭhat thu a sawi thung.
Chhinga Veng hian inhliam nei bawk mah se final-ah an player pawimawh an chhawr thei vek dawn. Aizawl FC hmachhawn turin Malsawmfela, R. Malsawmtluanga, MS Dawngliana, Laldampuia, Lalkhawpuimawia leh Lalrammuanpuia te an dam kim a, tlarhnungah MPL best defender nominee-a tel pha Lalrinchhana Tochhawng leh R. Laldinliana te bakah best goalkeeper nominee Zothanmawia te an awm bawk.
Aizawl FC ṭha zawk
Portuguese coach Paulo Meneses-a'n Mizoram football a hriat tawk loh avangin season tir lamah result a nei ṭha lo a, MPL-ah pawh chak hmel hmu turin match nga an khelh phawt a ngai. Amaherawhchu, Paulo hian player a hriat chian hnuah erawh champion rinkai ni phak khawpin an khel ṭha a, league round-ah pahnihna ni mah se MPL coach tam zawk chuan I League club hi champion turin an ring tawh zawk.
Aizawl FC coach Paulo chuan, "Champion turin kan ṭha tawk," tiin Chhinga Veng an hneh zawhah Vanglaini a hrilh tawh a, Portuguese coach hian ngaihdan la thlak loin champion a tum ruh hle.
Aizawl FC player pawimawh Andrei Ionescu chu league match hnuhnung bera a inhliam hnuah final-ah pawh a dinhmun a la chiang lo.
Romanian midfielder Andrei tel lo hian Aizawl FC-in hun pangngaiah Mizoram Police an hneh thei lo a, match hnuhnung pathumah chak hmel an hmu tawh lo. Chutirhualin khelmualah erawh inkhel thununtu an ni thei zel a, final-ah fiahna hau tak zawk an hmachhawn ang.
A hmuhnawm dawn
Aizawl FC ṭhatna chu set piece a ni a, Chhinga Veng coach Sanga chuan, "Police pawhin an dang thei a, keini pawhin kan dang ve thei tur a ni. Masih dang turin kan inzir ṭha e," tiin an ven uluk tur thu a sawi.
Afghan defender Masih Saighani hi feet ruk leh inches hniha sang a ni a, round 8 aṭang chauha khel ṭan chungin goal li a khung tawh a, amah dang tur hian Chhinga Vengin Mizo tlangval K. Lalthlahlova an hman a rinawm a, chhawr theih mai turin Nigerian defender Lassi Adeyemi an kawl bawk.
I League club hi set piece loah pawh an la ṭha tho a, H. Lalmuankima'n a vanglai hun a hmang ṭha leh mek. Bawngkawn tlangval MK-a hi Mizoram Police an hneh ṭuma man of the match a nih bakah Chhinga Veng an intawn hnuhnun ber ṭumin man of the match a ni bawk a, Armed Veng South tlangval Dinliana'n a veng tur hi a hmuhnawm khawp ang.
Season tawp lamah AFC winger Albert Zohmingmawia a che ṭha bawk a, midfielder fing leh thiam David Lalrinmuana, Lalṭhathanga leh H. Lalbiakthanga ten an chawm bawk avangin Chhinga Veng tlarhnung tan hna a tam ang.
Season ṭantirh lamah sawisel hlawh mah se Aizawl FC tlarhnung hi season tawp lamah meuh chuan tlarhnung nei ṭha ber an ni tawh. Aizawl Venglai tlangval Lalrinzuala Khiangte hian minute zawng zawng a la khel vek a, tlarhnung laia Masih kawppui Lalhriatrenga'n hrem vangin match khat chiah a khel lo. Season chawhnu lamah left back Lalramhmunmawia (Te-a) a rawn khel ṭha a, AFC tlarhnung a khawng sawt.
Amaherawhchu, Chhingcows-in midfield-ah ball siam thiam MS-a an kawl a, che rang Lalrinchhana'n a pui a, ball sem châng turin Mizo striker ṭha rual an awm a, Mizo coach ṭha remhriatna hnuaia an khelh bawk avangin Portuguese coach bang rem hi a nghet ṭha tih ngawt theih a la ni lo.
Mimal Lawmman
MPL Board-in mimal lawmman dawng thei tur player a tar chhuak tawh a, zanin final khelh zawhah result puanna leh lawmman semna neih a ni ang. Best player, top scorer leh position tina player ṭha ber hian Rs 5,000 ṭheuh an dawng ang.
Best player bik hian Samsung TV an dawng tel dawn a, lawmman hi Samsung 3:16 Plan Solution sponsor a ni.
Mimal lawmman dawng thei turte
Best Goalkeeper
1 Avilash Paul Aizawl FC
2 Lalmalsawma Chanmari West
3 Lalmuanawma Chanmari FC
4 Lalruatpuia Bethlehem VT
5 Zothanmawia Chhinga Veng
Best Defender
1 Lalrinchhana Tochhawng Chhinga Veng
2 Masih Saighani Aizawl FC
3 PC Laldinpuia Bethlehem VT
4 R. Laldinliana Chhinga Veng
5 Thomas Lalengkima Chanmari FC
Best Midfielder
1 David Lalrinmuana Aizawl FC
2 F. Zosangliana Mizoram Police
3 Jacob Lalrawngbawla Chanmari West
4 Lalrinchhana Chhinga Veng
5 R. Malsawmtluanga Chhinga Veng
Best Forward
1 F. Lalrinpuia Mizoram Police
2 H. Lalmuankima Aizawl FC
3 Lalfakzuala Mizoram Police
4 Lalrinfela Ramhlun North
5 Malsawmfela Chhinga Veng