Chhinga Veng tan kum Ṭha

Kum 2017 hi Chhinga Veng tan chuan kum ṭha a ni a, an hriatreng dan tur erawh MPL6 season an khar danin a hril ang.

Chhinga Veng hian MFA hnuaia inelna an hui vek a, MFA Super Cup leh I Day Football an chawi hnuah MPL Under 18-ah an champion. Nakkum aṭanga khelh ṭan tur Mizoram Futsal League khel tur zawnna playoff-ah tling hmasa ber a ni bawk.

Veng leh veng inelna NECS Cup-ah Chhinga Veng an champion a, CYMA Football-ah pawh semifinal thlengin champion zui ta Ramhlun South an hneh lo.

Infiamna dangah pawh Chhinga Veng hming a langsar hle. Pro Volleyball League-ah league round-ah khingpuite an hneh vek a, amaherawhchu final-ah Hunthar lakah an vanduai. Hetihlai hian thla hmasaa neih zawh tak Mizoram Volleyball Association buatsaih Invitation Tournament final-ah state pawn aṭanga chah luh Assam Regimental Centre hnehin an champion leh ta tho.

Mahuma Memorial Cricket Tournament-ah Chhinga Veng Cricket Club chuan league round khelh tur la nei chungin semifinal an lut tawh bawk.

Chutihrualin MPL nomawi an chawi leh si loh chuan a vuak lêt a na dawn. Zanin hian player 12-na mipui an thawh ṭhat a ṭul dawn a, Chhinga Veng mipuiin kawr var nen Lammual an pan a ngai.

MFA Super Cup leh I Day Football final-ah Chhinga Veng mipui an tam tawh a, MPL final-ah an tam lehzual dawn.

Chhingcows hian au hruaitu ṭha tak an nei a, zanin erawh a tawp kharna tur a nih avangin ṭum danga mumal zawka an rawn chetchhuah a rinawm.

Lammual gate hi tlai dar 6:30-ah hawn a ni ang a,
dar 7:15-a lut kim vek tawh turin mipuite kan ngen e - MPL Board