Sawmfela hun?

Mizoram Premier League Season 6-ah Mizoram Police forward Lalfakzuala'n goal 10 a khung a, final la hmachhawn tur zinga amah hnaih bertu chu Chhinga Veng striker Malsawmfela a ni. Ramhlun South tlangval Sawmfela hian goal 7 a khung tawh a, top scorer ni turin final-ah hattrick siam a ngai.

Striker vanduai

Mizo striker langsar Sawmfela hian MPL season nga khelh tawhah top scorer chawimawina a la dawng ngai lo a, ṭum hnih erawh top scorer goal khung zat a khung tawh thung. MPL3-ah Sawmfela hian Police winger Lalbiakhlua nen goal 9 ve ve khung mah se match a khelh tam zawk avangin chawimawina pek a ni lo.

MPL5-ah Sawmfela hian goal 11 khung tlingin Laldampuia nen an goal khung zat a inang chiah a, top scorer ni turin final-a goal khung belh emaw minute 78-naah thlak a ngai. Amaherawhchu, Chanmari coaching staff chhiarkawp chhutsual tuarin minute 80-naah lakchhuah a ni a, top scorer a nih lohna hi minute hnih chiah a ni.

Beiseina chu

Sawmfela'n tun season-ah minute 1045 a khel a, top scorer dinhmun hauh mektu Fakzuala'n minute 1233 khelin an inthlauhna hi minute 188 a ni a, final-ah extra time pawh khelh ni se Chhingcows striker hian khelmualah hun a hmang tlem zawk ang.

Zanin hian Sawmfela hian goal thum emaw a aia tam a khung a nih chuan top scorer a ni thei dawn a, he hmabak harsa tak hi tithei tur an awm a nih chuan ani aia duh thlan tur an awm chuang lo.

MFA Super Cup-ah Venghlui FC forward Vanrammawia Ngente-in goal 10 a khung a, final khelh hmain Sawmfela hian goal 8 khung mah se final-a Chanmari West an hneh theih nan hattrick a siam a, goal 11 khungin top scorer ni.

Sawmfela hi MFA Super Cup bakah I Day Football-ah goal a khung tam ber ni mah se MPL final-ah erawh hattrick siam an la awm ngai lo. Zaninah engkim a chiang ang.