A thiam 16 zingah goal khung thiam Liverpool
Champions League last 16 lut turin Liverpool tan harsatna a awm lo–Jurgen Klopp-a naute hian Nilaini zan khan an mikhual Spartak Moscow chu 7-0 ngawtin an sawp a, Group E hmahruaitu nichungin a thiam 16 zingah an inhlangkai.
Liverpool tan an thiampuipa Philippe Coutinho chuan Merseyside club tana a hattrick hmasa ber a siam a, Sadio Mane chuan goal hnih khungin Roberto Firmino leh Mohamed Salah ten goal khat ve ve an thawh bawk.
Fab Four = 7 goals
Liverpool-in tlarhmaah Coutinho, Mane, Firmino leh Salah an nei a, an hminglemah 'The Fabulous Four' tia koh an ni–Anfield-ah Fab Four ten an thiam thil an 'show' ta ngei a, last 16 lut tura chak mamawh Spartak tlarhnung an hawihai a, Fab Four an dang zo lo.
Minute lina lekah Salah chu Georgi Dzhikiya-a'n a tih tluk avangin Russian club-in penalty an chawi a, Coutinho-a'n goal-a chantir turin harsatna a nei lo. Minute 11 a liam a, Fabulous Four-ten mawi zeta ball an inpek kual hnuah Coutinho chuan an goal hnihna a khung chhunzawm–Firmino-a'n minute thum hnuah a khung ve leh a, goal dang lut loin chawlhlawk hman a ni.
A goal zel
Chawlhlawk hman a nih hnuah pawh Liverpool-in an goal khung an ṭhulh san lo–Sadio Mane chuan second half minute hnihnaah mawi zetin a volley goal a, Spartak keeper Aleksandr Selikhov-a'n en liam mai loh chu tih theih a ni lo. Coutinho-a'n a hattrick siamna goal a khung hnuah Mane leh Salah ten an chhunzawm leh a, Reds an tling chiang.
Group E inkhel dangah Sevilla chuan goal khat ve ve khunga NK Maribor an inhnehtawkpui avangin Liverpool hian draw chauh pawh hlawh chhuak se group hmahruaitu nichungin last 16 an lut tho ang–Premier League club zingah Chelsea, Manchester City, Manchester United leh Tottenham Hotspur-ten last 16 an lut bawk a, English club pangain a ruala Champions League last 16 an luh vekna hmasa ber a ni.
Reds an inpeih
Tlawm hmel hmu loin Liverpool-in last 16 an lut a, an hmaa ding thei club zingah Real Madrid, Bayern Munich leh Juventus an tel a, eng team tan pawh anni pathum hmachhawn hi thil chakawm a ni lo–club langsar ni lo zingah FC Basel, Shakhtar Donetsk leh FC Porto an tel bawk a, ram khat aṭanga last 16 lutte an inhmachhawn thei dawn lo a, Chelsea chu an pumpelh dawn tihna a ni.
Liverpool boss Jurgen Klopp chuan, "Kan hmaa ding turah ka buai lo a, kei hi chuan Real Madrid hi ka hmachhawn thei khawp mai. Kuminah he inelna hi a hautak lehzual a ni tih tichiangtu chu kan hmachhawn theiha Bayern Munich, Real Madrid leh Juventus an awm hi a ni. Tupawh hmachhawn dawn ila, inelna hautak a nih avangin lawm a harsa dawn a, mah se kan hmaa ding apiang hmachhawn turin kan inpeih ang," a ti.
100% Reds
Liverpool-in group stage-ah match ruk khelin goal 23 an khung a, English club zingah Champions League group stage-a goal khung hnem ber an ni; 7-0 a Spartak an sawp hma hian Maribor chu khualmualah 7-0 in an sawp bawk a, an goal khung 23 zinga goal 19 hi Fab Four-in an khung a ni!
Reds boss Klopp chuan, "Zanina kan khelh dan anga kan khel a nih chuan, goal hmaah zanin anga kan hriam chhunzawm zel a nih chuan last 16-a min hmachhawntu chu an vanduai ang. Tun ang renga kan khel a nih chuan 100%-in buaipui tham kan ni tih ka sawi ngam a ni," tiin a naute khelh dan a chhuang hle.