Atletico keeper Oblak hrilh a hai

Spanish club Atletico Madrid goalkeeper Jan Oblak chuan Champions League last 16 an luh loh chhan chu a hrilhfiah ngaihna pawh a hriat loh thu a sawi. Atletico hian Group C-ah hmahruaitu AS Roma leh Chelsea chu point lia phak loin an tla a, Europa League an khelh a ngai dawn.

Oblak chuan, "Kan beisei angin engmah a kal lo. Chelsea lakah point thum kan hlawh chhuak zo lo a, kan tla a, hlim a har a ni. Champions League aṭanga petchhuah kan nih miau avangin hlim a harsa a, tuna kan tih thei chu hma hun eng taka thlira kan hmabak match-ah te ṭha taka khelh hi a ni," a ti.

Kum 24 mi goalkeeper chuan, "Last 16 kan luh loh chhan hi sawi dawn ila, sawi tur ka hre lo. Kan match hmasa bera Roma nen kan inkhelh khan kan vanduai a, match hnihnaa Chelsea kan tum lahin hun tawp lamah goal an rawn khung. Qarabag lakah mi zawng zawngin chak turin min beisei a, mah se chutiang ngawt a ni bawk si lo. Roma kan hneh meuh kha chuan thil mak beisei a ngai tawh a, chu thil mak chu a thleng bawk si lo," tiin a thiam 16 zinga an tel lo chu a ui hle.

Atletico Madrid hian Champions Lea­gue group stage-a an match hmasa berah Roma chu goal khung loin an inhnehtawkpuia, Chelsea chu 2-1 in an ngam lo zui. An hneh ngei tura ngaih Qarabag chu vawi hnih inkhelhah an inhnehtawkpui ve ve a, an match hnuhnung pahnihah Roma hnehin Chelsea-in draw pui mah se awmzia a nei tawh lo.