Ronaldo leh Record

Cristiano Ronaldo chu Champions League group stage match tina goal khung thei awm chhun a ni leh ta. Real Madrid forward hian Nilaini zan khan Borussia Dortmund lakah goal khat khungin 3-2 in hnehna a chanpui a, tun season group match bikah goal kua a khung tling tawh.

Santiago Bernabeu-a inkhelah champion lai Real Madrid hian Borja Mayoral leh Ronaldo te hmangin si hnih faiin hma an hruai. Portugal captain Ronaldo hian player dangin an la tih theih ngai loh group match paruka goal khung vek tur hian box pawn aṭangin mawi zetin a pet lut.

Bundesliga club Dortmund tan striker Pierre-Emerick Aubameyang-a'n goal hnih hmangin chhanglet mah se hun tawp hma deuhin Lucas Vazquez-a'n La Liga club ropui tan chakna goal a khung. Real Madrid hian point 13 hmuin last 16 an lut a, an chungah point 16 hmutu Tottenham Hotspur an awm.

Kum 32 mi Ronaldo hian tun season La Liga-ah goal hnih chiah a la khung a, beisei a phak lo. Mahse, Champions League lamah erawh goal khung a chawlhsan ve lo thung, European club-te inelna sang leh ngaihhlut berah goal khung hnem ber niin goal 114 a khung tling tawh a, amah hnaih bertu Barcelona thiampuipa Lionel Messi aiin goal 17 zetin a sang fal zawk–Ronaldo hming lamrik rualin record in a zui zel rih a ni.

Real Madrid hmatawng Ronaldo chuan, "Champions League hi nuam ka ti a, goal khung zel pawh ka duh. Tuna pawimawh hmasa chu group stage paltlang hi a ni a, kan thil tum ber chu Champions League nomawi chawi leh a ni," tiin a sawi.

Spurs an thiam

Tottenham manager Mauricio Pochettino-a'n a player ṭha ṭhenkhat dahṭha chungin Apoel an mikhual a, Spurs hian Fernando Llorente, Son Heung-min leh Georges-Kevin N'Koudou te goal hmangin 3-0 in hnehna an chang.

Harry Kane, Christian Eriksen, Eric Dier, Kieran Trippier leh Hugo Lloris te inlan loh zanah Swansea City aṭanga Spurs zawmtu Llorente-a'n a club tana match 17-naah a goal hmasa ber a khung ve ta a, season hmasa goal 18 khungtu Llorente goal khung hi Spurs tan chanchin lawmawm a ni.

Argentine manager Poch-a naute hian point 16 hmuin group stage bikah point hmu hnem ber an ni a, last 16 draw neih hunah seeded an ni ang. Karleh Thawhṭanni hian UEFA headquarters, Nyon, Switzerland-ah draw hi neih a ni dawn.

Spurs manager Pochettino chuan, "Player hrang hrangin ṭha takin an khel thei tih hriat kha a nuam hle. Tunah chuan Premier League lama hnehna chang thei turin rilru kan seng zui nghal ang," a ti. Tottenham hian November 5 hnuah league match bikah hnehna an la chang leh lo a ni.