Shakhtar lakah Man City an chak lo

A zawna match 28 chhung hneh loh nei loa kal tluang tawh Manchester City chu an tlawm ve ta. Nilaini zan khan Pep Guardiola naute hi Champions Legaue group match hnuhnung ber khel turin Ukraine-ah an zin chhuak a, Shakhtar Donetsk lakah 2-1 in an tlawm.

Inkhel dangah Serie A team ṭha Napoli chu Feyenoord lakah 2-1 bawkin an tlawm a, City leh Shakhtar ten last 16 an lut; Napoli hian Europa League an khel zui thung dawn a ni.

City hian Group F hmahruaitu ni chiang tawh chungin Shakhtar Donetsk an hmachhawn a, mualneitu lamin Brazilian midfielder Bernard leh defender Ismaily te goal hmangin si hnih faiin hma an hruai, City goal neihchhun hi hun pek belha Sergio Aguero-a'n penalty aṭanga a khung a ni thung.

Spanish manager Guardiola-a'n Champions League-ah a naute match 100 a kaihruai tling chiah a, Sir Alex Ferguson, Arsene Wenger, Carlo Ancelotti, Jose Mourinho leh Mircea Lucescu ten he record ang hi an lo nei tawh; match 61 hnehna changin vawi 16 an chak lo thung–Barcelona a enkawl laiin nomawi vawi hnih a chawi hman a ni.

Premier League club zingah City, Liverpool, Manchester United leh Tottenham te chu group hmahruaitu an ni vek a, Chelsea erawh pahnihna an ni–Blues hi an match hnuhnung berah an chak zawh loh avangin Italian club AS Roma hnuaiah an awm.

Man City hi group hmahruaitu an nih avangin group danga pahnihna Bundesliga hmahruaitu Bayern Munich, Italian champion Juventus emaw European champion Real Madrid te chu an hmachhawn theih tur zinga mi an ni.

Shakhtar Donetsk manager Paulo Fonseca chuan hnehna an chan hnuah 'Zorro mask' (Hmaikawr) vuah chungin thuthar thehdartute a hmachhawn a, press conference a neih tawh zinga nuam leh hlimawm ber a nih thu a sawi, "Player-te chungah ka lawm a, hetiang hun kan thlen theih nan hian Ukraine mipui thlawpna kan dawng ṭha bawk," a ti.

Pep a hnual lo

Manchester City hian kum 2015-16 season khan Champions League last 16 an paltlang tawh a, he mi ṭum hian semifinal-ah Real Madrid an hneh lo, Premier League hmahruaitu hian kuminah a vawi hnih nan last 16 paltlang leh beiseina an nei sang hle.

City manager Pep Guardiola chuan, "Team pahnihin match hmuhnawm tak kan khel a, round sang zawk atan kan tlin ve ve avangin a lawmawm hle. An goal hmasa kha a ropui hle a, a vawi hnihna erawh kha chu kan fimkhur tawk loh vang a ni thung," tiin a sawi.

Spanish manager chuan rawlthar rual fak nghalin, "Tosin Adarabioyo, Phil Foden leh Brahim Diaz ten an khel ṭha hle a, fak an phu. Hnehna chan tumin kan zin chhuak a, theih tawp kan chhuah nachungin kan chak lo, kan khelh danah erawh ka lawm," a ti.