Season thar atan Serena a chiang

Australian Open tournament director Craig Tiley chuan season thara Grand Slam hmasa berah Serena Williams a inlan theih tur thu a sawi chiang.

Kum 36 mi Serena hian nikum khan raino chungin Australian Open a khel a, Grand Slam nomawi 23-na a chawi; he mi hnuah erawh a inkhelzui tawh rih lo.

American star hi Janaury thla a khelh tur Australian Open atan a dinhmun a chiang lo ni a sawi a ni a, tun hnaiah social media lamah tennis khel tura training a neih thu a tarlang leh tawh thung.

Australian Open tournament director Craig Tiley chuan, "Visa a nei tawh a, inelna hmachhawn turin training a nei tawh bawk, a inlan dawn leh dawn loh chungchangah chuan zawhna hran a awm thei tawh lo ang," tiin Serena chu Melbourne-ah a inlan tur thu a sawi.

World number 1 hlui Serena hi Open Era bikah chuan Grand Slam chawi hnem ber (23 titles) a ni a, hmeichhe tennis history pumpuiah erawh Australian legend Margaret Court chu nomawi pakhatin a la phak lo.