Court-ah Amiens an kal

French Ligue 1 aṭanga an tlaktir Amiens chu an dinhmunah an lungawi thei lo a, an dikna chanvo ang hmu tawk loah an inngai. Ligue de Football Professionnel (LFP) thutlukna khinglet turin Paris Administrative Court-ah an zualko.

Amiens president Bernard Joannin chuan, "Kan hmuh dan chuan infiamna khawvel aṭanga thlirin an thutlukna hi a dik tawk lo. A nihna takah chuan legaue hi an hrem a ni ringawt, thutlukna hi club zawng zawng tan a rualkhai tawk loah kan ngai.

"Kan theihtawpin kan bei let dawn a, kan dikna chanvo dik tak kan hmuh ngei theih nan kan bei zel dawn a ni," a ti. Ligue 1 club hian kar hmasa khan anmahni thlawptute hming ziak an lo la khawm tawh bawk.

Coronavirus vangin khawvel a buai a, infiamna khawvel pawh an bang bik lo. France sorkar chuan September thla hmain an ram chhungah infiamna lian neih a phal tawh lo, hei vang hian an league sang ber pawh khelh zui theih a ni ta lo.

LFP chuan match 10 khelh hmabak la awmah hmahruaitu Paris Saint-Germain an champion tir a, a hniam lama awm Amiens leh Toulouse te chu division hniam lamah an tlaktir thung. Ligue 2 aṭangin Lorient leh Lens te an kaisang ve thung a ni.

League an tih tawp lailawk lai khan Amiens hi table-ah 19-na an ni mek, an chunga awm Nimes aiin an hniamna chu point li chauh a la ni; match khelh hmabak an la neih hi khelh zawh ni ta se thil a la danglam thei viau ang tih chu a rin theih.

Amiens dan hre mi Christophe Bertrand chuan, "Season tihtawp hi kan thlawp lo a ni bik lo, hun tawn ngai loh kan tawn avangin hriatthiam a ngai. Chutihrualin league aṭanga tla bik awm loin, season khat chhung chu Ligue 1-ah hian team 22 a khelh theih dan kawng a zawn theih," tiin a sawi.

LFP thutluknaah hian Lyon pawh an lawm bik lo, pasarihna ni chunga season an khar avangin hun rei tak hnuah European football an khel phak dawn lo. Club president Jean-Michel Aulas chuan court lama an zualko tur thu a sawi nawn ve leh bawk.

Eng thutlukna pawh siam se a lawm leh lawm lo pawl chu an awm dawn tih a chiang. LFP chief executive Didier Quillot chuan, "Khinletna kan tawk mai thei, mahse kan thutlukna hi a nghet tawk," tiin season an tih tawptirh khan a lo sawi tawh.