NBA star rualin inelna chhunzawm an duh

Basketball legend Shaquille O'Neal chuan Covid-19 vanga NBA season an chawlh lailawk chu player leh mipui hriselna thlir chungin chhunzawm loin ti tawp mai se a duh thu a sawi a, tuna khel lai NBA star rual ngaihdan a dang thung.

Thawhṭanni khan NBA player langsar tak tak 'private conference call' hmangin an inrawn khawm a, Player Association president Chris Paul-a kaihhruaina hnuaiah  LeBron James, Anthony Davis, Kevin Durant, Giannis Antetokounmpo, Kawhi Leonard, Stephen Curry, Damian Lillard leh Russell Westbrook ten an ngaihdan an sawiho.

NBA star rual thlirnaah chuan ruahmanna ṭha tak a awm a nih chuan inelna kalpui ngei an duh a, player langsar ngaihdan hian inelna kalpui dan tur official-a sawiho hunah pawh awmzia nei pha tura ngaih a ni.

March 11 aṭang khan NBA season hi chawlh ṭan a ni. Zirtawpni khan NBA commissioner Adam Silver chuan, "Player-te hi Covid-19 lakah an him ngei ang tih kan tiam thei lo a, chutihrualin a him theih dan tur ber erawh kan ngaihtuah," tiin a sawi.

NBA hmalam hun sawi zuiin Silver chuan, "Inelna chhunzawm tur chungchang sawi turin a la hma hret a, June thla velah ngaihtuah chauh a ṭha ang," tiin Covid-19 nghawng nat dan thlir chunga hmalak a fin tur thu a sawi.