Chelsea tawp kharna palina Lampard-a season khatna hi a ṭha tawk em?

Chelsea legend Frank Lampard-a'n London club a enkawl hmasak berah palina a nih pui a, season tharah Champions League an khel dawn. Blues hian season hman zawh takah point 66 an hmu a, FA Cup final khelh tur an la neih avangin nomawi nen season an la khar thei ang.

Chelsea-in 2018-19 season khan Maurizio Sarri hnuaiah Europa League-ah an champion a, Premier League-ah pathumna an ni bawk. An record en chuan Blues hi 2019-20 season-ah nomawi beisei tur zinga mi an ni a, Manchester City leh Liverpool el pha turah an ngaih theih.

Amaherawhchu Italian manager Sarri-a'n Italian champion Juventus a pan a, Real Madrid-in London club star player Eden Hazard chu pound maktaduai 103.5 zetin an chhuahsak.  UEFA-in player naupang lakluh dan dik loh vangin Blues hi transfer window pahniha player lalut thei lo turin an hrem a (CAS-in transfer window khatah a tih hniamsak), Chelsea chungah beisei a sang ta lo.

Blues-in team enkawl turin club legend Frank Lampard an lalut a, English manager hian tawnhriat a ngah hran lo. Lampard hian season khat chhung Championship club Derby County a enkawl tawh a, parukna nihpuiin playoff final-ah Aston Villa an hneh lo.

Chelsea-in nikum January transfer-a Christian Pulisic an lalut hman leh Real Madrid aṭanga loan hmanga an hawh Mateo Kovacic an la nghet a, hremna tawrh dan ziaawm mah se Lampard-a'n a duh zawng a la lut lo.

Chelsea hi season ṭan nan Old Trafford-ah an lenglut a, Manchester United an hmachhawn. Frank Lampard-a hoten game mawi an khel a, academy chhuak Mason Mount leh Tammy Abraham ten hmun pawimawh an chang. Mount hi Lampard-a'n Derby-ah enkawl tawhin a hmang thiam tawh a, Premier League-ah pawh a ring chhunzawm zel.

Old Trafford-ah Blues-in ball chang tamin hmuhnawm takin khel mah se United counter attack an ngam lo a, an chak lohna chu 4-0 zet a ni. Goal dinhmunin Chelsea khelh dan a sawifiah lo a, amaherawhchu Lampard-a hote tan Champions League khelh phak pawh a harsa dawn tih a hriat theih.

Frank Lampard hi a inkhelh hun laiin goal khung theih avangin a lar a, a team enkawl Chelsea pawhin goal a khung thei hle. Player naupang Abraham, Mount leh Pulisic te hmangin an goal nawr a na, midfield-ah N'Golo Kante leh Jorginho te an nei bawk nen match hmasa 10-a Norwich City, Wolverhampton Wanderers, Southampton leh Burnley an hmachhawn ṭumin goal thum emaw a aia tam vek an khung.

Chelsea hian season chawhnu lamah pawh goal an khung thei chhunzawm a, amaherawhchu kum 2020 chinah chuan tawnhriat nei ṭha Olivier Giroud a rawn langsar ta thung. French striker hian match 18 aṭangin goal riat a khung a, Blues-in palina dinhmun an hauh theihna chhanah a ngaih theih.

London club hian goal 69 an khung a, Manchester City (102) leh Liverpool (85) te chiah an tluk lo. Goal venhim kawngah erawh Blues hi club naran an ni thung. Lampard-a hote hian goal 54 zet an chhuah a, top 10-a awm pha zingah goal an chhuah tam ber a, insiamṭhat an mamawh takzet.

Chelsea-in khawvel keeper manto ber Kepa Arrizabalaga an kawl a, amaherawhchu Spanish keeper hi a ṭha tawk tlat lo. Sarri hnuaiah Kepa a talbuai tawh a, Frank Lampard pawhin second keeper Willy Caballero chu vawi nga zet khelhna hun a pe. Season kharna inkhelah Kepa aiin Caballero a lut a, Blues hian keeper thar chu an melh ngei dawn niin a lang.

Blues tlarhnungah mimal taka fak tur an awm lo. Captain Cesar Azpilicueta khel tam berin match 36 a inlan a, kum 30 mi defender hi club hruaitu ni mah se defender ṭhaa chhal a har. Hei chauh hi a ni lo, defender beiseiawm an kawlte lah inhliam vangin a buai a, tawnhriat nei ṭha ber tura ngaih Antonio Rudiger lah a rintlak tawk lo. Mak ang reng tak erawh transfer boruakah Chelsea hian defender aiin attacking player an la melh nasa zawk!

Chelsea-in October thla chawhnu lam aṭangin palina dinhmun an luah a, helai hmun hi tun season-a an awm tamna ber a ni. Season tawp lamah pathumna dinhmun hun rei lote an chelh a, tawpah erawh an awm tamna ber palina tho an awm.

Blues hian point 66 an hmu a, season thum liam taa an champion ṭum kha chuan point 93 an hmu. Hemi hnu hian league-ah champion lo ve ve mah se point 70 leh 72 an hmu pha tho tih hriat a ṭha a, chumi piah lamah FA Cup leh Europa League-ah an champion bawk.

Season li chhung thlirlet chuan Chelsea an tlahniam zel tih a lang a, Frank Lampard-a hote thlen chin hi a ṭha tawk lo tihin a sawi theih. Chutihrualin nipui transfer-ah player an lalut thei lo a, Lampard-a'n team thar a din avangin Blues thlirna tarmit thlaka khelmuala an chet dan thlir chuan season ṭha tak an hmangah a sawi theih thung.