Khawvela football pet thiam ber Ronaldo
Cristiano Ronaldo hming sawi a bang thei lo - Real Madrid forward hian Ningani zan khan khawvela footballer ṭha ber chawimawina Ballon d'Or a dawng a, a vawi nga dawnna niin Lionel Messi nen an dawn zat a in ang ta chiah.
Barcelona thiampuipa Lionel Messi chu pahnihna a ni a, Barca aṭanga Paris St-Germain pan thlangtu Neymar chu pathumna a ni. Ronaldo chuan, "Kumtinin he chawimawina dawn tum hian ka bei ṭhin," a ti a, a beisei mimal chawimawina a dawng leh ta chu a lawm hle.
Ronaldo a hlim
Portuguese forward hian he chawimawina dawng tur hian season hman zawh takah khan Real Madrid chu La Liga leh Champions League-ah nomawi chawipuiin goal 42 ngawt a khung a, Euro 2016-ah Portugal chuan a captain-na hnuaiah champion nomawi an chawi bawk.
Kum 2008, 2013, 2014 leh 2016-ah pawh he chawimawina lo dawng tawhtu Ronaldo chuan, "Real Madrid-a ka khelhpuite chungah ka lawm a, he dinhmun thleng tura min puitu te zawng zawng chungah lawmthu ka sawi a ni," tiin a thlen chin chu mahni maia tih theih a nih loh thu a hai lo.
Ballon d'Or chu?
French football magazine lar France Football chuan 1956 aṭang khan Ballon d'Or chawimawina hi a lo sem tawh ṭhin a, mah se FIFA nen an thawhdun hnuah kum ruk chhung chu FIFA Ballon d'Or tih hming puin khawvela footballer ṭha ber hnenah an sem ṭhin.
FIFA nen thawhdunna September 2016-a tihtawp a nih hnuah Ballon d'Or tih tawpa sem chhunzawm leh a ni a, FIFA hian a hranpaa award kalpui ve lehin kuminah pawh Ronaldo hi Best FIFA Men's Player-ah thlan a ni - Ballon d'Or dawng tur hi khawvel hmun hrang hranga journalist 173-in an thlan a ni.
PL lam hawiin
Mizote ngaihven hlawh ber Premier League lamin player an thawh ve nual a, Chelsea midfielder N'Golo Kante chu Premier League player zinga thleng sang ber niin pariatna a ni - Tottenham striker Harry Kane chu 10-na a ni bawk a, anni pahnih hi Premier League player zinga top ten-a lang an ni.
Manchester City midfielder Kevin de Bruyne chu 14-na a ni pha ṭawk a, Chelsea playmaker Eden Hazard chu 19-na a ni. Liverpool forward Sadio Mane chu 23-na a nih laiin playmaker Philippe Coutinho chu 29-na a ni thung.
TOP 30
1 Cristiano Ronaldo Real Madrid
2 Lionel Messi Barcelona
3 Neymar Barcelona/ PSG
4 Gianluigi Buffon Juventus
5 Luka Modric Real Madrid
6 Sergio Ramos Real Madrid
7 Kylian Mbappe PSG
8 N'Golo Kante Chelsea
9 Robert Lewandowski Bayern Munich
10 Harry Kane Tottenham
11 Edinson Cavani PSG
12 Isco Real Madrid
13 Luis Suarez Barcelona
14 Kevin De Bruyne Man City
15 Paulo Dybala Juventus
16 Marcelo Real Madrid
17 Toni Kroos Real Madrid
18 Antoine Griezmann Atletico Madrid
19 Eden Hazard Chelsea
20 David De Gea Manchester United
21 Pierre Aubameyang Borussia Dortmund
21 Leonardo Bonucci Juventus/ AC Milan
23 Sadio Mane Liverpool
24 Radamel Falcao AS Monaco
25 Karim Benzema Real Madrid
26 Jan Oblak Atletico Madrid
27 Mats Hummels Bayern Munich
28 Edin Dzeko AS Roma
29 Philippe Coutinho Liverpool
29 Dries Mertens Napoli