Treble champion Chhinga Veng

Chhinga Veng tan kum 2017 hi kum ṭha bik a ni. Coach Lalsangzuala Hmar hnuaiah MFA Super Cup leh I Day Football an champion hnuin Mizoram Premier League-ah an champion an ni leh ta a, MFA hnuaia nomawi lian pathum an chawi vek.

Chhingcows hian treble champion tur hian nizan khan Lammualah I League champion Aizawl FC chu R. Malsawmtluanga goal hmangin 1-0 in an hneh a, chakna goal khungtu MS-a hi MPL6 best player atana thlan a ni.

Darlawn tlangval MS-a hian MFA Super Cup-ah best midfielder chawimawina a dawn bakah I Day Football-ah best player-ah thlan a ni tawh bawk.

Inlan dan

Aizawl FC-in hahchawlhna hun nei tlem mah se player inhliam an ngah a, Romanian midifielder Andrei Ionescu a la inhliam bawk avangin starting eleven-ah semifinal-a Mizoram Police hnehtu bawk an hmang.

Chhinga Vengin Chanmari FC an hneh ṭumin an player pawimawh pathum Malsawmfela, Laldampuia leh MS Dawngliana te bench-ah an dah a, final-ah erawh Dampuia leh Dawngtea ten inkhel bul an ṭan tawh. Goal sarih khung Sawmfela erawh bench-ah ṭhuttir a ni a, top scorer ni tura goal thum a mamawh avangin mimal lawmman a beiseina a thamral nghalah a ngaih theih.

Innghahna tlak Dampuia

Kawrtethawveng tlangval Dampuia a langsar nghal a, Chhinga Veng winger ball pet kawh tak chu AFC keeper Avilash Paul-a'n a dang nghal. Minute 5-naah Dampuia cross chu MS-a'n a tauh goal a, player ṭha pahnihin Chhinga Veng mipui lawmna an siam.

Minute sarihnaah Dampuia corner pet chu captain Lalrinchhana Tochhawng-in tauh fuh mah se Aizawl FC player-te'n goalline aṭangin an pet chhuak.

I League club-in final khelh hmain hahchawlhna hun an nei tlem zawk tih a lang a, inkhelh ṭantirh lama an goal chhuah an tuar bawk.

First half tawp lamah AFC captain David Lalrin­muana freekick a hlauhawm a, amaherawhchu Agfhan defender Masih Saighani-a'n a chance ṭha neih a khung lo. Hun chanve lama khel ṭha zawk Chhingcows-in halftime-ah 1-0 in hma an hruai.

An harh tlai

Chhinga Veng bawkin second half-ah bul an ṭan ṭha a, goal chance pawh an ngah zawk. Amaherawhchu, Aizawl FC lamin chak tumin an nawr let a, captain David-a ball pet chu keeper Zothanmawia'n a dang hman a, Zemabawk tlangval David-a freekick pet ṭha zet chu crossbar chungah a kal bakah College Veng tlangval T. Mawia hian Masih goal khung tur ṭha takin a dang bawk.

Hun tawp lamah best forward-a thlan H. Lalmuankima'n a theihna a rawn lantir a, goal erawh a keng tel lo. East Bengal nena injury time-a siphurh sutna goal khungtu William Lalnunfela pawh a vanneih ṭum a ni lo a, penalty beiseiin box chhungah tlu mah se referee-in a pe lo.

Paulo Meneses-a'n chak tumin Afghan defender Masih chu striker tir mah se danglamna a ni pha lo a, I League club hun tawp lamah an ṭang ulh a, goal an khung loh bakah referee-in William-a a hnawtchhuak bawk.

Chhinga Veng an lawm

Lammual khat tlatin mipui an pungkhawm a, Chhinga Veng mipuiin season tawpah an hlawhtlinna an lawm. Chhingcows hi league round-ah hmahruaitu an ni a, Aizawl FC chiah an hneh lo.

Match pawimawh ber final-ah Chhinga Veng FC hian phuba an la a, I League champion chu final-ah hnehin a vawi khat nan Mizoram Premier League-ah an champion.

Coach Lalsangzuala Hmar chu coach zinga MPL nomawi pahnih chawi thei hmasa ber a ni a, season liam ta khan Chanmari FC chu a champion pui tawh bawk.

Mimal lawmman
Best Goalkeeper : F. Lalmuanawma
Chanmari FC goalkeepaer F. Lalmuanawma hi match 16 an khelh aṭangin vawi 12 a inlan a, clean sheet vawi li neiin goal vawi 11 a chhuah. Muanawma inlan loh ṭum liah hian Chanmari FC hi vawi thum an chak lo.
Best Defender : R. Laldinliana
Chhinga Veng defender R. Laldinliana hian match 17 an khelhah vawi khat chiah khelh loh a nei a, Armed Veng South tlangval hi vawi 14 starting eleven-ah inlanin goal hnih a khung bawk.
Best Midfielder : R. Malsawmtluanga
Chhinga Veng midfielder R. Malsawmtluanga'n vawi 15 inkhel bul an ṭan ṭumah a khel tluan vek a, Chhingcows ball siamtu hian ball ṭha tak taka a siam bakah goal 5 a khung bawk.
Best Forward : H. Lalmuankima
Aizawl FC winger H. Lalmuankima hi best forward huangah dah a ni a, I League club final a thlenpui avangin best forward-ah thlan a ni. Bawngkawn tlangval hian hrem vangin MPL match hmasa pahnih a khel lo a, phase 1-ah khelhna hmun chan harsat mah se season chawhnuah hmun pawimawh changin goal nga a khung a, ṭum thum man of the match-ah thlan a ni.
Top Scorer : Lalfakzuala
Mizoram Police striker Lalfakzuala'n goal 10 khungin top scorer a ni a, Armed Veng tlangval hian match 14 khelin match hnih a inlan lo a, minute 123 dana goal khat khung zel ang a ni. Fakzuala hnaih bertu a teammate F. Lalrinpuia'n goal 9 a khung ve bawk.

ZoFooty Statistics
Chhinga Veng FC 1 - 0 Aizawl FC
CVFC : R. Malsawmtluanga 5'
47% Ball Possession 53%
13(7) Shots (On Target) 10(6)
3 Yellow Cards 4
0 Red Cards 1
Powered By
Rainbow Mulitbrand Mobile Showroom