Witsel leh Can khel dawn lo

Tun kar tawp aṭangin Bundesliga khelh chhunzawm a ni dawn a, champion beisei lai Borussia Dortmund chuan Inrinni zana Schalke an hmachhawn hunah Emre Can leh Axel Witsel te chu hliam vangin an la chhawr thei rih dawn lo.

Bundesliga pahnihna ni lai Dortmund player pahnih hi tihrawl na vangin an ṭhiante zingah an training mumal ve thei lo, match an khelh chhin ṭum hnihah pawh an inlan thei lo a, inelna pangngaiah pawh an inlan lo zui ang.

Dortmund coach Lucien Favre chuan, "Player zawng zawng inkhel turin inpeih se tih chu duhthusam a ni, amaherawhchu infiamna a nih tawh chuan hliam leh harsatna dangte hi chu a ken tel a ni," a ti.

European league lian zingah Bundesliga hi hri len hnua an khelh leh hmasak ber a ni dawn, a hmunah entu an awm lo ang. Dortmund leh Schalke inkhel hi 'Ruhr derby' tia sawi ṭhin a ni, kum 95 hnua a vawi khat nan entu awm loin an khel ang.

Bundesliga-ah hian champion lai Bayern Munich chuan hma an hruai mek a, an elpui Dortmund nen an inkarah point li a awm mek; match khelh hmabak a la tam avangin champion tur a la chiang lo.