Kolkata club inlan hun

Zanin dar 5:30-ah I League match a awm dawn a, Kolkata club lian East Bengal chuan Shillong Lajong an mikhual dawn. Pathianni chawhnu dar 2:00-ah Kolkata club lian bawk Mohun Bagan an inlar ang a, Churchill Brothers an mikhual dawn thung.

East Bengal-in an match hmasa pahnihah hnehna an chan zawh loh avangin team boruak a chhia tih hai rual a ni lo a, match hnih an khelh tawha hnehna la chang ve ve, Mizo tlangval Samuel Lalmuanpuia captain-na hnuaia khel Shillong Lajong an mikhual dawn avangin fimkhur a ṭul khawp ang. Mohun Bagan-in match hnihah point li an nei tawh a, an hmachhawn tur Churchill Brothers hian vawi khat khelh tawhah point an la nei lo.

Mangṭha Jamil?

East Bengal-in I League nomawi chawi beiseiin Aizawl FC ṭangin Khalid Jamil an lalut a, club training session chhimtu fan-te au hla erawh 'Haw rawh Jamil' tih a ni leh der tawh–India international hlui hian a club hlui AFC lakah point hnih a hlohah a ngaih theih a, fan-te ngaihhlut Kolkata Derby-ah Mohun Bagan an ngam lo bawk.

Mahse, East Bengal thuneitute chuan I League coach hlawh hnem ber ni tura an thlem luh coach hi an la ṭan tlat niin an sawi a, official-te buai zawkna erawh Willis Plaza a ni. Trinidadian striker hian Kolkata club hotute mit a tlung tawh lo a, a thlakna tur an zawng mek–an duhthlanna hmasa ber Ranti Martins-a'n USA lama a khelhna February hmain a chhuahsan thei lo a, Scottish second division-a St. Mirren FC tana khel mek Bagan striker hlui Darryl Duffy leh an striker hlui, Nigerian Premier League lama khel mek Chidi Edeh te an beisei bawk a, an buai zia hai rual a ni lo–Khalid a hmabak a ko hle.

Dicka a dam

Mohun Bagan-in an match hmasa berah Minerva Punjab inhnehtawkpui mah se Kolkata derby-ah hnehna an chan miau avangin an boruak ṭhat vanglai tak a ni a, I League season hmasaa top scorer Dipanda Dicka chu a inhliam hnuah Churchill hmachhawn turin a dam leh hman bawk.

Porto youth system chhuak Diogo Ferreira-a'n coach Sanjoy Sen mit a la tlung thei lo a, Goan club a hmachhawn kher ang em, a hriat loh.

Bagan captain Sony Norde chuan tun hnaiah a hranpain a player puite titipuina a nei niin an sawi a, I League-a player hlawh hnem ber hian a ṭhiante chu box chhungah mahni hmakhua ngai lutuk lo turin a fuih–Pathianni zanah khelh dan danglam fan-ten an beisei ang.